Shillong, Nailar 01: Ka NorthEast United FC kan sdang ban ïada ïa ka nam lahduh jong ka ha ka Durand Cup 2025 pyrshah ïa ka Malaysian Armed Forces ha JN Stadium ha kane ka sngi Saitjaiñ. Ka jingïalehkai kan sdang ha ka por 7 baje janmiet.
Hadien ka jingjop kaba khlem shah rem ha ka lympung kaba la dep kaba la pynlong ïa ki ban ïoh ïa ka khusnam lahduh kaba nyngkong, ka NorthEast United FC ka la kut jingmut ban ïada ïa ka burom jong ki.
Katba kane kan dei ka jingïalehkai kaba nyngkong jong ka NorthEast United ha kane ka lympung mynta ka samoi, na bynta ka Malaysian Armed Forces kadei ka jingïakhun kaba ar, ha kaba ka la shah rem kput haduh 6–0 kol ha ka Shillong Lajong ha ka jingïalehkai kaba nyngkong.
Hashwa ban jam sha ka sngi ïakhun, u Juan Pedro Benali, head coach jong ka NorthEast United, u la ong “Ka kynhun ka la trei shitom bha ha kine ki lai taïew ba la dep bad Ngi kyrmen ba Ngi la pynkhreh bha bad Ngi la pynleit jingmut bha na ka bynta ka jingïalehkai ba sdang jong Ngi pyrshah ïa ka Malaysian Armed Forces”.
“Kadei ka final kaba nyngkong ngi hap ban ïakhun lada Ngi kwah ban ïada ïa ka burom lahduh jong Ngi,” la bynrap u Benali, uba dang shen u la pynjlan ïa ka kontrak haduh u snem 2027.
