Shillong, Naitung 07: Ar tylli ki klob trai ri jong ka Jylla Meghalaya, ka Shillong Lajong bad ka Rangdajied United ki la shah pynïakap lang ha kajuh ka Group ryngkat bad ka lahduh ka ban ïada ïa ka burom, kata ka NorthEast United bad kawei ka kynhun Shipai na bar ri ha ka Group E na ka bynta ka 134th Durand Cup 2025, katkum ka prokram ba la pynbna hynne ka sngi.
Ki jingïalehkai na ka bynta ka Group E kin long ha JN Stadium, Polo, ïa kaba yn sdang naduh ka 26 tarik Naitung.
Hadien ka jingïalehkai kaba itynnat ha u snem 2024, ka Lajong ka la shah pynkhyllem noh ha ka NEUFC ha ka semifinal, ha kaba katei ka klob Indian Super League club ka la ïaid shakhmat ban jop syndon ïa ka nam lahduh pyrshah ïa ka Mohun Bagan ha Kolkata.
Kumjuh, ka Rangdajied kan wanphai biang sha ka Durand Cup hadien ba ka la shah jied ïa ki kum ka nongbujli ha u snem ba la dep namar ba ka Hyderabad FC ka la weng noh ïalade na ka jingïakhun. Ka kynhun kaba saw kan dei ka kynhun shipai na bar ri.
Ka jingïalehkai ba nyngkong jong ka Durand Cup mynta u snem kan long ha ka 23 tarik Naitung hapdeng ka East Bengal pyrshah ïa ka South United FC na Bangalore ha Kolkata.
Kane ka lympung kaba neh shibnai kan don 43 tylli ki jingïalehkai ha kylleng ki hynriew tylli ki nongbah, bad kan kut da ka phainal ha ka 23 tarik u Nailar.
Ki jingïalehkai group stage ki kynthup ïa hynriew tylli ki Group kiba don mar saw tylli ki kynhun, ha kaba baroh ki Group kin ïalehkai mar hynriew sien. Hynriew tylli ki kynhun lahduh jong kine ki 6 tylli ki Group bad ar tylli ki kynhun kyrdan ba ar kiba kynsai tam kin jam shakhmat sha ka quarterfinal, kaba la pynkhreh ban long ha ka 16 bad 17 tarik Nailar. Ka semi final ha ka 19 bad 20 tarik Nailar. ïa ki jaka na bynta ki jingïalehkai knockout yn sa pynbna ha ka por kaba biang.
Ka Kolkata kan pynlong ïa ki jingïalehkai jong ka Group A bad B. Hadien ka jingïalehkai jong ka East Bengal pyrshah ïa ka South United FC, ka Indian Air Force bad ka klob I-League ka Namdhari FC kin sdang ïa ka jingïalehkai ba nyngkong jong ki pyrshah ïa ka SUFC ha ka 27 bad 30 tarik Naitung, marïabud.
Ka Group B kan sdang ha ka 28 tarik Naitung, ha kaba ka Mohammedan SC kan aireng ïa ka Diamond Harbour FC ha Kishore Bharati Krirangan. Ka jingïalehkai Kolkata Derby hapdeng ka lahduh jong ka ISL ka Mohun Bagan bad ka Mohammedan SC kan long ha ka 31 tarik Naitung ha kajuh ka madan. Ka Border Security Force kan sdang ïa ka jingïalehkai ba nyngkong pyrshah ïa ka Diamond Harbour ha ka 01 tarik Nailar.
Ki jingïalehkai jong ka Group C ban long ha Jamshedpur kin sdang ha ka 24 tarik Naitung, ha kaba ka Jamshedpur FC kan aireng pyrshah ïa ka Tribhuvan Army FT (Nepal) ha JRD Tata Sports Complex, katba ka Indian Army bad ka 1 Ladakh FC kin ïakhun ïa ka jingïalehkai kaba nyngkong ha ka 29 tarik Naitung bad 02 tarik Nailar, marïabud.
Ka Kokrajhar kan pynlong ïa ki jingïalehkai jong ka Group D, ba kynthup ïa ka klob ISL ka Punjab FC, ka Karbi Anglong Morning Star FC, ka Bodoland FC bad ka Indo-Tibetan Border Police. Ka ITBP kan ïakhun ïa ka Karbi Anglong ha ka 27 tarik Naitung ha ka jingïalehkai ba nyngkong. Ka Bodoland FC kan ïalehkai nyngkong ha ka 31 tarik Naitung, katba ka Punjab FC ha ka 03 tarik Nailar.
Ka Group E ha Shillong kan sdang ha kaba ka Lajong kan aireng pyrshah ïa ka kynhun kaba na bar ri ha ka 26 tarik Naitung. Ka NorthEast United, kan sdang ban ïada ïa ka burom ha ka 02 tarik Nailar pyrshah ïa ka kynhun kaba nabar. Yn sakhi ruh ïa ka jingïalehkai Shillong Derby hapdeng ka Lajong bad ka Rangdajied ki ban ïatynjuh bor ha ka 29 tarik Naitung.
Ha Manipur, Imphal, ka Khuman Lampak Main Stadium kan pynlong ïa ki jingïalehkai ba nyngkong na ka bynta ka Group F ha ka 30 tarik Naitung, ka ban sdang da ka jingïalehkai Derby hapdeng ar tylli ki klob I-League, ka TRAU FC bad ka NEROCA FC. Ka Indian Navy bad ka Real Kashmir FC kin sdang ïa ka jingïalehkai na ka Group F ha ka 02 tarik Nailar.
