Shillong, Lber 17 : Ka jingslem palat jongki heh ne nongïalam Bharatiya Janata Party (BJP) na Delhi ban pynbna ïa ki kyrtong ha kane ka jylla Meghalaya ka la nang pynduh lyer ïa ka BJP namar wat haduh mynta ba la dep pynbna ïa ka tarik ban ïathep vote ruh ki nongïalam bad ki nongkyrshan jongka BJP kim pat lah ban leit shano shano ruh ban ïalap election namar kim pat tip mano ban ïoh tiket ne ban long kyrtong ka party la ka dei hangne ha Shillong Parliamentary Constituency ne ha Tura Parliamentary Constituency ruh.
Kumta kane ka jingpynslem ka la pyndiaw jingmut jingpyrkhat ïa ki nongïalam bad nongtrei ba shitrhem jongka party namar ki tip shai ba ka long kaba eh ïa ki ban pyndep ha baroh ki constituency hapoh kane ka shibnai.
Ka Election Commission of India (ECI) ha ka sngi Saitjain, kala pynbna ba ka jingïathep vote ha kine ki artylli ki constituency ka Jylla Meghalaya bad kiwei ki Jylla ka thaiñ Shatei Lam Mihngi, kan long ha ka 19 tarik Iaiong.
Ka BJP na Delhi, kala dep ban pynbna ïa 267 ngut ki kyrtong ban ïakhun ïa ka elekshon hynrei kala buhteng ban pynbna ïa ki kyrtong ban ïakhun ha Meghalaya bad ha kiwei kiwei ki jylla ruh.
Kat kum ka jingïathuh u President ka BJP Meghalaya Rikman G Momin, ka Party ka la ïoh pdiang haduh san tylli ki kyrteng jong ki kyrtong kiba kwah ban ïakhun na Shillong bad hynriew tylli na Tura constituency. Kine ki san ngut ki dei u Myntri Sorkar Bah AL Hek, u President barim ka party Bah Ernest Mawrie, ka kong Fenela L Lyngdoh, Mewaker Lyngdoh Pakma bad Sumita Laloo.
Na Tura pat ki dei u MDC ba mynta ka Tura Bernard N Marak , Boston Marak , Riya Sangma, KC Boro, Winnerson D Sangma bad Thomas Sangma. Kumba long mynta, ki kyrtong kiba la pynbna ban ïakhun na Shillong seat ki dei u MP ba mynta ka Congress u Ma Vincent H Pala, ka Myntri Sorkar Dr Ampareen Lyngdoh na ka NPP, u bah Robertjune Kharjahrin na ka UDP, u Dr Ricky AJ Syngkon na ka VPP bad Prof Lakhon Kma kum u kyrtong shimet.
Na Tura, ka MP ba mynta Agatha K Sanga kan ïakhun na ka NPP, u MLA ka Congress Saleng A Sangma bad u Nongïalam ka TMC Zenith Sangma.
