Nongstoiñ, K’Lyngkot 02: Ki nongïalam jong ka West Khasi Students Union ki la ban jur ba ka por ka la dei eh, ban pynkhlaiñ shuh shuh ïa ki rukom treikam ha ka tnad ba dang shu thaw thymmai dang khyndiat snem, kata ka tnad Territorial Division.
Ka seng halor kane ka bynta ka la dep ban ïakynduh ruh ïa u D.F.O jong ka District Social Forestry & Territorial Division Nongstoiñ, ha kaba ha ka jingshisha kane ka tnad ka la sdang treikam ha u snem 2018, ban khmih na ka bynta ka jingpynneh pynsah ïa ki khlaw ki btap bad ha kiwei kiwei ki kam kiba katei ka tnad ka dei ban peit ha ka thaiñ.
Lah ban pynpaw hangne ba haba ïakynduh ïa ki heh sorkar jong katei ka tnad, ki la pynpaw ba ka long kaba shisha ba la don ïa katei ka tnad. Hynrei ki dang don shibun ki jingduna ha ka liang ki nongtrei bad haduh mynta ïa ki nongtrei hapoh ka Territorial Division la nang pyndonkam da ki juh ki nongtrei kiba don hapoh ka tnad Social forestry haduh mynta.
Ki nongïalam jong ka seng ki la buh jingkylli ruh ïa ka jingïar treikam jong katei ka tnad. Halor kane, u D.F.O u la ong ba ïa mynta la bthah da ka sorkar ba hap ban peit da katei ka tnad ïa baroh artylli ki District kata West bad South West Khasi Hills District. U la ong ba ka kam ka la ban khia bha, nalor ba ym pat thung ïa ki nongtrei ba pura ha katei ka tnad ba dang shu thaw thymmai.
U la pynpaw ba katei ka tnad Territorial Division, ka dei ban don la ka jong ka ka jaka ban treikam. Hynrei ïa mynta ym pat don bad ka bor ban tei ïa ka tnad treikam ka shong ha ka sorkar jylla ban mang tyngka na ka bynta ban tei ïa ka tnad treikam.
Halor kitei ki jingdonkam ba bun, ka seng ka kyntu eh ïa ka tnad ba ha khlieh jong ka jylla kaba dei ban khmih na ka bynta ban pynneh pynsah ïa ki dieng ki siej bad ki khlaw ki btap, ba kin phah noh mardor ïa ki jingtyrwa kiba ïa hap dur bad ki jingdonkam jong katei ka tnad kaba don ha Nongstoiñ.
U Bah D.Sun President u la ong, “Ka tnad Forest ka dei ban leh ei ei kham kloi lada dei ïa ka jingpynïoh noh la ka jong ka jaka ba pura, ban tei ïa ka tnad treikam bad ruh ban mang tyngka noh ne thung pura noh ïa ki nongtrei ba pura ha katei ka tnad, khnang ba katei ka ka tnad kan pyntyllun kham sted ïa ki kam na ka bynta ka jingpynneh pynsah ïa ki khlaw ki btap bad ruh ban the lakam ïa ka jingpynjot ïa ka mei mariang”.
“Ka seng ka kyntu ïa ka sorkar jylla khamtam ïa u Myntri ba dei khmih ïa ka tnad pynneh pynsah ïa ki khlaw ki btap kumjuh ïa ka jing jyrngam ka mei mariang, ba un shimkhia kham kloi ïa kane ka mat ba dang bun ki jingpynbha, khnang ba ka jingthmu pynneh pynsah ne tyngkai ïa ki khlaw ki btap kin long kiba don jingmut hakhmat ki paidbah”, u la ong.
