Bunsien ngi ju peit beit tang sha kiei kiei kiba don jingthut, ki jingduna bad ruh ki jingbymbiang khamtam lei para jaidbynriew ne para Hynñiewtrep. Hato kam la dei ka por ba ngin peit noh sha kiei kiei kiba don jingkyrmen, kiba ai mynsiem bad ruh kiba ngin lah ban ïatei lem iwei ia iwei pat. Ngi kynmaw ba wat ha ka jinghikai jong ka Kospel, u Jisu uba la pyrthei ka ñiew ba u dei uwei na ki nonghikai bakhraw um ju kren bieñ ia ki briew kiba tlot, kiba pop bad kiba bakla, hynrei u ïai ai mynsiem bad kyrkhu ïa ka jingim jong ki. Haba ki riewniam ki wallam ia ka kynthei kaba la kem ia ka ha ka klim u la ong “ai ba uta u ba khlem leh pop un kawang maw nyngkong”. Hooid kane ka long kaba donkam ïa ngi baroh ban shim ïa ka jingbah khlieh na ka bynta ka ri bad ka jaidbynriew ba ñiew ban ka dei ka kamram jong nga jong ngi ban ïarap markylliang bad ai mynsiem ïa kiwei ym tang ban kdew kti.
Ki don shibun ki khana kiba pynnoh mynsiem ïa ngi ki Khasi kum uta u thlen uba bam tang ïa ki Khasi, ban ïashun ïa bishni bad ïa kdew kti tang para Khasi bad kumta ter ter. Hynrei to ngin shim ba kane ka la dei ka por ba kum ka jaidbynriew ngin leh ei ei noh bad sdang na ngi shi met shimet. Katno ka long shisha kaba itynnad ban ïohi ba ki samla Khasi ha kine ki sngi ki la sdang ban kiew bha ha kiba bun ki liang khamtam ha kaba klet noh ïa kata ka jinglehraiñ hynrei ban trei ïa ki kam kiba rit ba ria kum kaba shong dukan die madan ban die ïa ki alumuri, ki shana, pakawri, ki chat ne fast food aiu re ban ïoh jingim wat haba ki la pyndep ïa ki jingpule ruh. Hooid ki don bun kiwei pat ki jaitkam ba ki samla Khasi ki la sdang ban ïadonbynta bad trei shitom ha kine ki sngi.
Kum ka imlang sahlang ngi donkam ban pynshlur bad ai mynsiem ïa ki samla ban long kiba trei shitom bad dei tang lyngba kaba kum kane ba ngin lah ban pynduna ia ka jingwan buhai shnong jong ki bar jylla. Ka sorkar khamtam lei ki sengbhalang ki donkam ban peit bad buddien ïa ki briew kiba trei ia ki kam la jong kiba kum kitei ban ithuh kyrpang ruh ïa ki khnang ban ai mynsiem ïa ki samla la jong ba kin shimti noh ai ki kam ki jam ba iadei bad ki paidbah kiba la ju trei bad shakri da kiwei pat ki jaitbynriew ha baroh kine ki 50 snem naduh ba ngi la ïoh ia la ka jong ka jylla ba pura.
Ki dang don shibun bah ki kam kiba ki samla Khasi kin hap ban pyntbit kyrpang ïalade khnang ba kin lah ban ai ïa ka jingshakri sha ka jaidbynriew bad ka jylla hi baroh kawei. Hynrei ka long kaba shisha kumba la ong da ki nongïalam jong ka HYC Shillong City ba ngi ki khasi ngi ïa ud ba ym don kam, hynrei katba ïa ki dukan pat ngi aiwai noh sha ki bar jylla. Kane ka dei kaei kaei kaba jwat shisha namar ba mano bym kwah ban ïoh ïa ka dor kaba kham heh namar da aiwai para khasi kin ym lah ban pynmih baiwai katba ki bar jylla pat tang ban ïoh phrung khlieh ki kloi ban siew ïa ka dor kaba rem. Kane ka long shisha ka jingkhanglad noh ïa ki paradoh parasnam ban ïoh ïa ki lad ban trei ban ktah bad ban khaiï pateng.
Kumta, kum ka jaidbynriew ngi donkam eh ban kylla thiah kylla dem bad ban long kiba ïohi jngai ha kaba iadei bad katei ka bynta ka jingailad palat ïa ki briew kiba nabar. Kum ki trai ïing ne ki trai dukan ki donkam ban don ïa ka mynsiem ba sngew lem ïa ka lawei jong ki khun ki kti bad ka jaidbynriew wat lada ngin kham ïoh kham duna ruh ka baiwai ngin pyrshang ban ai sha ki para jait la jong khnang ba ngin lah ban noh synñiang sha ka lawei ba don jingkyrmen jong ka jaidbynriew. Ngi ki Khasi ngim dei ei kiba sniew ne khwan lalot, hynrei ngi donkam pat jingpuson khyndiat khnang ba ngin ïoh ia ka mynsiem ba jynsur ban peit ia ka jingshngaiñ bad ka lawei jong ka jaidbynriew.
Kumta ngi donkam shisha ki nongialam ki ba stad ban long kita ki ksiang kiba jem ka kren ka khana ban pynsngewthuh paidbah ïa kaei kaba kum ka jaidbynriew ka donkam eh. Lada ngin shu kren da ka bor khlem ka jingieit kan poi shano shano ruh, dei na kata ka daw ngi donkam ban long kiba ïohi jngai khnang ba kiei kiei kiba ngi leh bad thmu kin long kiba jop.
