Donkam ïa ki seng saiñ pyrthei ban ai jingmut halor ka jingwanrah ïa ka lynti rel, ong u Bah Shangpliang

Shillong, Jymmang 13: U Nongaiktien ka seng National People’s Party (NPP) u Bah Himalaya M Shangpliang ha ka sngi baar u la kyntu ïa baroh ki seng saiñ pyrthei ba kin ïashim bynta ha ka all-party committee bad ba kin ai jingmut jong ki ha kaba ïadei bad ka jingpyntreikam ïa ki railway project ha ka jylla.
“Ngi kyntu ïa baroh ki political party ba kin shim bynta ha ka all-party committee ha kaba ïadei bad ki projek railway. Ka sorkar jylla ka la ai ïa ka rynsan ha kaba baroh ki nongïalam jong ki political party ki lah ban wan lang ban ïakren ïa syllok haba ïadei bad ki kam ka ïoh ka kot jong ka jylla lyngba ka lynti rel,” ïathuh u Bah Shangpliang.
“Lada ka Congress bad ka VPP ki sngewba ki don ka jingkitkhlieh na ka bynta ka roi ka san jong ka jylla, ki dei ban ïashim bynta ha ka all-party meeting ban ai ki jingmut jong ki. Kane kan ïarap ïa ka sorkar jylla ba kan lah ban shim ïa ka rai ka ban wanrah ïa ka roi ka par ïa ka jylla bad ha kajuh ka por ban pynïoh ki lad jingïada na ka jingwan rung kyrthep ki briew ba nabar,” u la ong.
Haba banjur halor ka jingdonkam ban sngewthuh ïa ka jingdonkam ki jingpynïasoh ka lynti rel, u la ong, “Lada ka jylla kum ka Mizoram ka pdiang sngewbha ïa ka lynti rel hadien ba la sngewthuh ïa ki jingdonkam jong ka, ngi tieng ba ka por kan wan ba dei tang ka Meghalaya ha North East ka bym don ka jingpynïasoh bad ka lynti rel.”
“Ka NPP kam kwah ïa ka jingwan rung ki briew kiba nabar. Namar kata ngi kwah ban don ka jingïasyllok jong baroh ki seng saiñ pyrthei naba ngi donkam ïa ka lynti rel bad ngim kwah pat ïa ka jingwan rung kyrthep ki briew ba nabar,” ong u Bah Shangpliang.