Donkam da u Lat ba nang kren English ban kren ha Iingdorbar ban myntoi lang u paidbah: VPP
Shillong, Rymphang 16 : Ka Voice of the People Party (VPP) ka la ong ba na bynta ka jingmyntoi lang jong ki paidbah ka jylla donkam ban ïoh da u Lat uba kren da ka ktien English hapoh Ïing Dorbar Thawaiñ ka jylla.
“Kane kadei na ka bynta ka bit ka biang bad ka jingmyntoi lang jong ki paidbah kiba sngap shabar jong ka Ïing Dorbar,” ong u President ka VPP Bah Ardent Miller Basaiawmoit ba dei ruh u MLA ka Nongkrem haba kren bad ki lad pathai khubor.
Shuh shuh u la ong ba na ka party hi kim pat da hun eh watla na ka liang ka ophis u Lamphang ki la pynkhreh da ki jingpynkylla ktien.
Na ka liang u Bah Ardent u la ong ba kum ka party ka khmih lynti ba ka sorkar kan shimkhia ïa kane ka kam bad ïakren bad ka sorkar pdeng khnang ba ha ki por ban wan kin phah noh da u Lat uba lah ban kren da ka ktien kaba ki paidbah ruh ki sngewthuh lang.
U la ong ruh ba kane kadei ka sien kaba nyngkong ba u Lat un pyndep ïa ka jingkren lamphrang jong u ha Ïing Dorbar tang ha i por ba lyngkot.
Ha kajuh ka por, u la ïathuh pat ba ka party ka la pynkhreh bun ki ishu ban ïatai bad ïa kren ha kane ka Dorbar Mangtyngka kaba sdang naduh kane ka sngi Thohdieng.
Shuh shuh u ong ruh ba ka jinglyngkot palat ka Dorbar Mangtyngka kan ym ailad ïa ka party ban rah bun ki ishu kiba ïadei bad ka jylla.
Haba jubab pat halor ka jingkylli halor ka jingïatylli ki Liang Pyrshah hapoh Ïing Dorbar, u Bah Ardent u la ong ba kam dei satia ka jingshisha ba kim don lang kajuh hynrei u ong pat ba haba uno uno u kren shaphang ka jingïatylli ka liang pyrshah kam mut ba ka jingïatylli kan dei tang haba don ha kajuh ka lama.
“Naduh ka sngi kaba nyngkong ngi la dep ban pynpaw ba ngin treilang bad baroh ki kynhun ha ka Liang Pyrshah haba ïadei bad ki ishu kiba ïadei bad ka jylla bad ki paidbah nongshong shnong,” bynrap biang u Bah Ardent.
U ong ruh ba ka party ka kloi ban treilang bad no bad no haba ïadei bad ki ishu bad ka party kan ym don jingeh hi ruh ban treilang lane kyrshan ïa ki ishu ba rah da kiwei ki party kiba don ha ka Liang Pyrshah.
Haba kren pat halor ka elekshon MP kaban sa long shen, u President ka VPP u la ong ba ka party shen kan sa sdang noh ïa ka jingïalap elekshon.