Donkam ban tip ïa ki khana ki riewkhraw ka jaidbynriew
![](https://mawphor.com/wp-content/uploads/2022/02/editorial.jpg)
Ka jingma kaba khraw tam ïa kano kano ka jaidbynriew ha kane ka sla pyrthei kadei ka jingklet ne bym tip shuh ki longdien ïa la ki khla ka wait, ki riewkhraw pyrkhat kiba la ieng ïaleh ban pyllait im ïa la ka jong ka jaidbynriew naka jingshah thombor jong ki bor synshar ki nongwei bad ha ka juh ka por na ka jingshah long mraw sah shi junom.
Lada kylli bha na ki ba bun ki longdien aiu ki tip ne bna ïa la ki khla ka wait, ne shaphang ki riewkhraw pyrkhat ka jaidbynriew, ka jubab ban ïoh kan long kham niar kiban da tip bniah bha, hynrei ka shu long thohmut thohmat, ne don ruh kiba shu jubab da kaba shu antad, namar ha ki skul ba ki shong pule, ki khynnah kim ïoh jinghikai ne jingnang tip kaba paka naka bynta ki khla ka wait jong ka ri, kiba la ieng ïaleh ban ïada ïa la ka jong ka jaidbynriew, na ka jingwan ban thombor, ban dakhol ïa ki jaka bad ban seng nongrim syndon ïa ka jait jingngeit niam kaba thymmai.
Kum ka jaidbynriew, ngi ieng sarong ka khlieh namar katba nang mih ki sngi, ka seng ki samla pule ka jylla, ka shim ha la ka lyngkor da kaba ïai tei ïa ki mot dur, jong ki khla ka wait ka jaidbynriew, katta kum u Tirot Sing Syiem, Syiem ka Hima Nongkhlaw, u Kiang Nangbah, ïa kaba ngi ngeit skhem ba kin dang ïai bteng ba kan pynim ne ban pynneh bad ruh ban pynsah shuh shuh ïa kiba bun ki khla ka wait ka jaidbynriew, kiba la ieng ban ïada ym tang da ka thma, hynrei wat kiba la ieng ban ïaleh da kaba pynim ruh syndon ïa ka tynrai jingngeit, nangta haka thoh ka tar, ka rwai ka siaw ka put ka tem tynrai.
Ngi la im ïa long ïa man ha ka juk kaba ïa ki khana sahnam pateng la pateng la lah ruh ban wanrah ha ki dur ba-im, da kaba ki nongthoh kot kiba batai shaphang ka jingim ki khla ka wait, mynta ngi lah ruh ba ngin saiñ dur saiñ dar ïa ki ha ki rukom ban shna pynwandur ïa ki ha ka phlim ka donkam bha ba kan ïoh ba kan rung noh shi syndon ha man la ki kamra jong ki skul kiba don ha ri Khasi-Jaiñtia, namar da ka jingïohi ïa kano kano ka kynja phlim, ka shong junom ha ka jabieng jong ki khynnah, ha kaba kim nym lah shuh ba kin klet ba pleng kum ka jaidbynriew ka don shisha ïa ki khla ka wait jong ka ri, ki bym ïapeiñ ïa u sbai ba u nongwei u la bret ha ka lynti ïaid ka jong u ban lait naka jingshah kthong, hynrei ki lum ïa la ki rang ïapom, ban pynieng kein ïa la ka jong ka daw, ban im ka pateng longdien kaban wan.
Shuh shuh ka por ka la dei ba ki bor pynïaid skul ha kane ka ri lum Khasi Jaiñtia, ki don kam ba kin pynrung ruh ïa ka kynja jingpule kaba kham kyrpang sha ki khynnah, katta ka long ïa ka sobjek shaphang ki riewkhraw, ki khla ka wait bad ki myllung kiba kum ka jaidbynriew ki la mih paw, ha kaba ka kam shlur ka jong ki, ka jingïar ka pyrkhat ka pyrdaiñ bad ki kyntien ba ki la thoh ha ka sur ka poetry, da shisha ym tang ba ka shu ktik ïa ka jingmut haba pule ïa ki, pynban ka da kyrsoi naduh ka thwei jong ka dohnud, ban nang ban ieit bad ban sharai kynthop ïa la ka jong ka jaidbynriew.
Ka jingdon ki sobjek ba kyrpang, kan ïai pynim ïa ka jaidbynriew, kaba khlieh la ki sngi, ki eriong ki erngit ki ïai wan ban beh, ki narsaw ki ïai bteng ba kin sam lyngba ïa kane ka jaidbynriew. Dei lyngba ka jingdon khnang ki sobjek ba kyrpang, ba kum ka jaidbynriew, kan lah ban ïai bteng ban sei madan shuh shuh ïa ki riewkhraw, ki khlaka wait bad ki riewshemphang kiban ieng ïaleh naka bynta ban pynim bad ban pynneh ïa ka jinglong kaba kyrpang kum ka jaidbynriew.
Hynrei ka jingeh ka long ba ha man la ki rympei iing, ban shong ha sawdong ka lyngwiar dpei ban sei ïa ki tien sneng kitien kraw ïa la ki khun ki kti, ki para ki pyrsa kam don shuh, namar ba baroh baroh la ïa im shisha ha katta ka juk kaba la shu ïabeh ïa ka kamai spah, ha kaba ym don shuh ka por kaba kylluid kaba ka kmie u kpa, u kñi kin ïoh ïa ka por ban ïoh ban ïasyllok shi iing shi sem. Shuh shuh don lei lei kiba la tynneng jubor bha ïa la ka jinglong kaba kyrpang, ha kaba wat ka ktien ka thylliej ban ïa kren ïa khana ha iing ka sem, la kren pynban da ka ktien nongwei, hana ba ym sngewnang shuh ban kren ïa la ka jong ka ktien, namar ha skul ne kolej ïa ka sobjek jong ka ktien Khasi la kyntait ne weng noh shi syndon ïa ka sharud bad bym treh ban bteng ban pule ïa ka.
Lada kum kine ki jingpyrkhat ki wan ba kin ïai rung ha kane ka pateng kaba mynta, aiu pat kein kan jïa ïa kane ka jaidbynriew naka bynta ka pateng kaban dang wan. Ki jaidbynriew bakhraw tam ha ka pyrthei ki ïai im namar ha kaba nyngkong ki ieng ïa leh ban pynim shwa ïa la ka jong ka ktien, ki da pynieng rasong ïa ka khana jong ki khla ka wait, ïa la ki riewkhraw, ki da nguh da dem ne ban da bud shisha ïa ki matti ba ki longshwa ki man shwa ki ïalam ïa ki.
Kumta, ki khynnah skul bad ki samla pule jong ka jaidbynriew, wat riej ne wat tieng ne sngewlehraiñ ban nang bad ban tip ïa la ki jong ki khana sah nam jong ki khla ka wait bad la ki jong ki riewkhraw, pynban ha ino ma ino I por iba kylluid, shim ïa ki kot bad pule pynleit jingmut bha shaphang jong ki, ha kaba ha lyndet phin sa lap bad shem ïa ki kynja symboh pyrkhat kiba long kum ki mawlynnai kiban long pat ki spah bah ïa ka jingim kaba man la ka sngi ka jong phi.