Jowai, Nailar 10: Ka ophis u Deputy Commissioner, West Jaiñtia Hills District, ha ryngkat ka jingïatreilang bad ka ophis u District Sports Officer, WJHD Jowai kin pynlong ïa ka Independence Day Run – 2023 na ka bynta ki shynrang bad kynthei (open category).
La pyntip ba ïa kane ka jingmareh marathon yn sdang ban kaweh ïa ka lama naduh Main Gate Kiang Nangbah Stadium bad mareh na Ladthadlaboh Main Road – Jowai Public School – Gate Polytechnic – Kshaid Rymphum – Salaroh – Dulong Poh-hali Road – Dulong – Pamhadem – Panaliar(Civil Hospital) – Iongpiah – Mission Compound – H.K. Singh School – D.C Office – New Hill – National Highway bad pynkut ha Kiang Nangbah Indoor Stadium.
Na ka liang u ma K. Passah, District Sports Officer ula ïathuh ba yn pynlong ïa ka Independence Day Run – 2023 haka 15th August, 2023 naduh ka por 6 baje mynstep, ka jinglum kyrteng (Spot Registration) ïa ki nongïashim bynta kan long ha Kiang Nangbah Indoor Stadium, Jowai ha ka por 5 shiteng mynstep.
Ka ophis u District Sports Officer, West Jaiñtia Hills District, Jowai ka khot sngewbha ïa baroh kiba dei napoh ka West Jaiñtia Hills District ba kin wan ban ïashim bynta lang. Ïa ki khusnam sha baroh ki nongjop yn sam da ka song pisa bad ki Mementoes.
