Shillong, Nailar 02: Ka sorkar jylla ka la kyntu ïa ki riewshemphang bad ki samla pule kiba trei bad kiba pule shabar jylla bad shabar ri ban pynrung kyrteng bad ka government portal da kaba pynthikna ruh ba ïa ki jingtip ba bniah jong ki yn buhrieh bad ban buh ha ki jingshaniah.
Haba kren sha ki lad pathai khubor ha ka sngi Thohdieng u Nongaiktien ka sorkar MDA bad u Myntri ka sorkar jylla u Bah Paul Lyngdoh u la ong, “Ka jingpynrung kyrteng ïa ki riewshemphang bad ki samla pule kiba trei bad kiba pule shabar ri ka dei ka sienjam kaba donkam bha na ka bynta ka sorkar jylla.”
U la ong ba la shim ïa kane ka rai na ka daw jong ka jingjia ïaumsnam ba dangshen ha ri Bangladesh ha kaba bun bha ki nong Meghalaya ki la hap ban wan phet noh na katei ka ri.
“Kumta ki kam ki la long kiba kulmar namar ha ka jaka kaba nyngkong ngim don ki jingkheiñ haduh katno ngut ki nong Meghalaya kiba sah lane kiba leit sha ri Bangladesh. Kumta shisien ba la pyndep ïa ka jingpynrung kyrteng, ka sorkar jylla kan sa pynkhlaiñ ïa ki bor jingtip bad ban ïoh ki jingkheiñ lada wan kum kine ki jingjia huri hura bad ruh ban lah ban shim kam kloi ban ïarap ïa la ki jong ki nongshong shnong,” u la bynrap.
Katkum ka jingong jong u, ka jing register kam long kaba dei beit ban leh. “Hynrei ngi kwah ban pynshlur ïa ki ban pynrung kyrteng, hynrei ïa ki jingtip ba bniah jong ki yn buhrieh pyrkhing bha bad ba kan don ruh ka jingshaniah na ka liang jong ki,” u la ong.
