Donkam ban pynneh ïa ka shongsuk shongsaiñ ha shilynter ki jaka khappud, ong u Gandhi
Shillong, Rymphang 02: U Ravi Gandhi, Additional Director General (ADG), BSF Eastern Command, kolkata, ha ka jingwan jurip jong u kaba lai sngi sha kane ka thaiñ ban peit ïa ka jingshim khia bad jingkitkhlieh jong ki shipai BSF hapoh Guwahati frontier u la shim ïa ka jingbishar bniah ha kaba ïadei bad ka jinglong kaba la khreh jong ki shipai ha kaba ïadei bad ki jingjia ha khappud hapdeng ka Indo-Bangladesh ha Distt- Coochbehar (WB).
Ha ka sngi wanjngoh ha Sector Headquarters Coohbehar, u Ravi Gandhi la synran da u Sanjay Gaur, Inspector General (IG) ka Guwahati Frontier, ha ryngkat lang bad ki heh ophisar.
Haba kren halor ki lad jingïada haba ïadei bad ki jingjia ha ri Bangladesh bad ki sienjam ba la shim ban ïakhun ïa kine ki jingeh ka la don ruh ka jingïasyllok kumno ban ai ki lad jingïada ha kaba ïadei bad ki jingwan rung tuh, ki kam runar bad ka jingshong shngaiñ ha ki kam khappud.
U Gandhi ha kajuh ka por u la leit ruh ban jngoh ïa ka Border Out Posts (BOPs) ha shi lynter jong u pud u sam ka Indo-Bangladesh kaba dang hab hapoh u pud u sam bad jingkhmih ka Sector HQ Coochbehar. U la ïasyllok ruh bad ki field commander, u la bishar bniah ruh halor ki rukom treikam ha khappud bad kumjuh ruh ban ïakhun ïa kino kino ki jingjia kiba ma kiba lah ban wan ha kano kano ka por.
Na ka liang u ADG u la banjur halor ka jingdonkam ban pynneh ïa ka shongsuk shongsaiñ bad ka jingsngew shi para ha shi lynter ki jaka khappud bad kumjuh ruh ban pynthikna ïa ki lad jingïada ïa ki nongshong shnong bad kumjuh ruh ban peitngor ïa ki kam runar kiba jia ha ki jaka khappud.
Ha kawei pat ka liang u Gandhi u la ïaroh ïa ki kam shakri ba khlem shong thait bad ki jingaiti met bad mynsiem jong ki shipai BSF ban ïada ïa u pud u sam jong ka ri. U la ïaroh ruh ïa ki shipai kiba don ha Guwahati Frontier ban ïakhun ïa ki kam runar ha shi lynter jong u pud u sam ka Indo-Bangladesh bad ki jinglah jong ki ban pahara ïa u pud usam kiba long ki mat kiba kongsan na ka bynta ki shipai BSF.
U la kyntu ruh ïa ki shipai ba kin ïai long kiba peitngor bad ban bteng ïa ki kam ban pynneh ïa ka jingïalong kawei ha shi lynter u pud u sam ka Indo-Bangladesh.