Donkam ban pynkhlaiñ shuh shuh ïa ka tnad syntiat: Bah Mayralborn
Ka jingjia ha Tura ka pynsyier ïa ki nongmihkhmat
Shillong, Naitung 26 : Ka jingjia khah khah ka jingshah thombor jong ki nongmihkhmat paidbah da kaba sdang shwa ïa ka Iingsah jong ka Myntri ka Koit ka Khiah Kong Ampareen Lyngdoh bad hadien sa ïa ka jaka pynlong jingïalang u Myntri Rangbah dang shen ha Tura, ka la pynlong ïa u MLA ka Nongpoh, Bah Mayralborn Syiem ban dawa ba dei ban pynkhlaiñ shuh shuh ïa ka tnad syntiat jong ka jylla.
Haba kren bad ki lad pathai khubor ha kamra treikam jong u, utei u MLA ba dei ruh u Chairman jong ka Health Advisory Board u la ong, “Kaba kongsan tam kadei ka jingshngaiñ ïa baroh. Tangba ka jingjia ha Tura ka kdew ba ka don ka jingduna hangne hangtai khamtam ban pynmynsaw ïa u Myntri Rangbah ka Jylla kadei ka jingjïa kaba ym lah satia ban pdiang.”
Kumta halor kane, u ong ba ki kyntu ïa ka sorkar jylla ba kadei ban pynkhlaiñ shuh shuh ïa ka tnad syntiat (Intelligence Wing) khnang ban wanrah ïa ka shongsuk shongsngain ïa baroh la ka long ïa ki nongmihkhmat bad kumjuh ïa nongshong shnong ka jylla
Ha kajuh ka por u ong ruh ba ki pynrem jur ia ki riew shimkabu kiba thmu ban pynmynsaw ia u Myntri Rangbah ka Jylla. “Ngim lah ban pdiang ba kan jia kumne ïa ki nongmihkhmat paidbah. Lada ïa ki nongmihkhmat ki dang nud kumne katno tam ïa ki paidbah,” u la bynrap shuh shuh.
Da kaba kdew ba kino kino ki don ka hok ban ïakhih ha ka riti synshar laitluid, hynrei u Bah Mayral unong ba kim dei pat ban shim ïa ka ain ha ka ki jong ki kti hynrei ki dei ban kiar ban wanrah ïa ka huri hura.
“Tangba ym dei ban pyllait ïa ki riewshimkabu la ka long ïa kino kino ruh hynrei ki dei ban ngat ha ka jingshah pynsaja. Kine ki jingjïa kim dei ruh ban wanrah kano kano ka jingshongsyier,” u la bynrap biang
Kumban shu kdew hangne, ki pulit ka jylla ki la ïoh ban kem palat 20 ngut ki briew kiba suba donkti ha katei ka jingjia thombor ïa ka ophis u Myntri Rangbah ka Jylla kaba ha Tura, ha ka por ba u dang shong jingïalang bad ki kynhun kiba ïakhih ban dawa ïa ka Winter Capital.
Ha katei ka jingthombor ki la don haduh san ngut ki pulit kiba la mynsaw.