K a rep Syntiew lehse kan kylla long pat sa kawei ka lad kaba lahb an kyntiew ia ka ioh ka kot bad ka ioh kam ioh jam jong ki khun samla bad ia ki paidbah hi baroh lada ka sorkar ka shim khia ban kyntiew bad pynkhlain bha ia kane ka jingrep syntiew hapoh ka jylla.
Hynrei khnang ba ka jingmih kan kham long kaba kham bun bad kaba lah ruh ban kham pynmih paidbah, ka por ka donkam ïa ka tnat treikam jong ka sorkar jylla ne ka Floriculture ba kan wan noh shakhmat ban pynshlur, ban ai ïa ki jinghikai kiba paka ïa u paidbah, khnang ba ka jylla ym tang ba kan lah ban pynmih ïa kiba bun jait ki syntiew ki skut ba kan da lah ruh ba kan khaiï ïa ki shabar naka jylla lajong.
Haba ïaid bad ïeng kylleng sawdong jong ka jylla, kiba bun na ki ïing briew, ki ïaleh beit ba kin thung ïa ki har rukom ki syntiew, namar haba ki la phuh, ki da khring bad ïarap ban pynitynnad ïa ka ïing ka sem hi baroh kawei, tang namar ka jingsien ïewbih jong ki syntiew, ka khmat kam lah ban khlem da phai naka bynta ban khmih ïa ka jingphuh itynnad jong ki syntiew ki skud.
Katno tam lei lei ba ha kane ka juk kaba mynta, wat ha ki thaiñ nongkyndong lada ym dei shuh ka por ban bteng ïa ka rep ka riang namar ba la kut ka por ka samoi, lehse, lah pat ban btin lynti ïaki nongrep ba hla ki jong ki kyrpong ïing ki lah pat ba kin pynlut ïala ka jong ka por bad ka sngi ka jong ki, da kaba ki phai lem ruh tiak sha ka rep syntiew, namar kumba ka long mynta, lada ka rukom rep ka biang bha bad lada ki syntiew ki skud kida phuh rong itynnad bha, ka ïew ïa ki ka long kaba ïai don beit ïaki, Ia kaba ka dor ruh lah ban ong ba kam dei kaba da poh.
Lada ym ïa bakla don ki jylla ha ka ri kiba shim ïa ka lad rep syntiew kum kawei pat na ki lad kamai, kaba da pynshlur ruh ïala ki paidbah, ba kin ïa rep ha la ki ïing ki sem ki jong ki bad ka sorkar jylla ka jong ki, ka shim pat ïa ka bynta ba kan long kum ka nongïarap ban khai ne ban thied ïa ki syntiew bad ban shalan ruh shabar ka jylla.
Kum ka jylla, ka don ruh ïa kiba bun bah ki jait syntiew ki skut kiba itynnad bad kiba man bad mih kynrei bha ha man la ki shong bad ki thaw, ïa kaba kum u paidbah pat, um pat shim ne ñiewkor ïa ki, pynban haba u nongwei u nongar u wan ban ïuh kjat kai shi sngi, haba u lap bad u shem ia u kynja syntiew uba phylla, u kloi ban shon ne ban ring ïa ka dur, namar ba u syntiew haba u phuh u daphuh itynnad bad ba pynïapbiej bha ïa u briew, long thik la kumba u ïapmat shisha ïa kano ma kano ka thei samla kaba im kata ka jingim ba burieh ïala ka jong ka dur bhabriew hapdeng ki khlaw ba rben ba dba jyrngam.
Kum kine ki jait syntiew kaba ngi juh sin kum ki tiew khlaw, ki bun bha ha kane ka jylla, ha kaba don ruh napdeng jong kine ki syntiew kiba la jan duh jait ne don ruh pat kiba mih ne ba phuh kat kum ka por ka samoi ïa ki ba kin phuh.
Lada ïakren ia ka khana shpahang ki syntiew, ka long ka khana kaba sngewtynnad, hynrei ka por pat ka long ba ïa ka khana ïalap thung ia ki syntiew la dei noh ban pynkylla ïaka sha ka lad kamai ka lad kajih, ka lad kaba lah ban wanrah ïa ka nam bd kaban sien ïewbih ïa kane ka jylla, lada u paidbah bad ka sorkar jylla ki kloi shisha ba kin ïa lam khmat naka bynta ban rep paidbah ïaki.
Nalor kata, kum ki samla bala nangla stad, lehse am long kaba eh ia ki ba kin sdang ïala ka jingim kamai ka jong ki ïa kaba rep ïa ki syntiew, namar don ruh ki por bad ki samoi, ba ka ïew ban die ïaki ka long kaba thnem bha, katno tam lei lei haba thung ïa ki syntiew bap huh itynnad, tang kata ka ïew ïa ki ka long kaba thnem bad kaban bun bha ka jingdawa na u paidbah hi salonsar ban thied ïa ki ban ioh banbuh kai ha la ïing ha la sem.
Haba la sdang ban mih pat ka pisa, kata ka jingbym ïoh kam ruh kan jah noh bad ba ka por ruh ym don shuh, namar ba ka jingdawa ka la long kaba jur, ïa kaba ka lah ruh syndon ba kan plie lad plie lynti ïa kiwei pat ki para samla ba kin ïa snoh kti lang ban ïa treilang kum ka kynhun ban nang pyniar shuh shuh ïala ka jong ka kam da kaba rep ïa ki syntiew.
Toi ka jingthoh lah ban ong ba kadei kaba la shu thoh tang na sla, pynban, to shim ïaka kum ka jingmait phang, namar ba ha kane ka juk kyrduh kam kaba mynta, kum ki samla ba biang ka kti ka kjat, ba la kieng ha la ka met ïala ka jingnang ka jingstad bynriew, klet noh ïa ka jingap khmih lynti ban ïoh kam shakri sorkar, hynrei to pyrshang katba lah naka bynta ban sdang ban ïeng noh joit hala ki jong ki kjat, long keiñ ka nongmuna ïa kiwei, khnang ba kin bud lem ia ka dienjat kaba phi kum ki samla phi la dep ba phin maitphang ïa ka.
