Donkam ban pynbha ïa ki rukom sumar ba la hiar pateng naduh ki longshwa manshwa: Dr Joram Beda
Shillong, Naitung 05: Ka Bio-Resources Development Centre (BRDC), kaba hapoh ka PIP&SD Department, ka sorkar jylla ka la sam ïa ki syrnot jingithuh ïa 9 ngut ki nongsumar kynbat Khasi ne Traditional Community Healthcare Providers (TCHPs) na kylleng ka jylla hapoh ka Voluntary Certification Scheme for Traditional Community Healthcare Providers (VCSTCHP) jong ka Quality Council of India (QCI).
Ïa kane ka prokram ai syrnot la pynlong ha Secretariat Wellness Centre, Secretariat Hills, Shillong, kaba dei ruh ka jingpyrshang jong BRDC ban pynneh, ban kyntiew bad ban pyntbit ïa ki kam pynkhiah ha ka jylla.
Ïa kine ki nong sumar dawai kynbat Khasi la ithuh halor ka jingtbit jong ki ban sumar ïa ki jingpang ba ju ïa ïoh paidbah, nangta ka jingpang, jaundice, ka jingkheiñ shyieng bad ka arthritis.
Kane ka jingai syrnot ka pynthikna ba ka rukom sumar katkum ki longshwa manshwa ki dei ban don ki jingïada, ka ban tei ka jingkieng hapdeng ka jingstad sumar ki trai ri trai muluk bad ka rukom sumar katkum ka juk ba mynta.
Kane ka jingithuh kan ailad ïa ki nongsumar Khasi ba kin ïoh ruh ki skhim bapher bapher na ka Ministry of AYUSH, GOI.
Ha kane ka prokram la wan ban shim bynta da Dr Joram Beda, IAS, Commissioner & Secretary, Health and Family Welfare, ka sorkar jylla bad Director, AYUSH, uba la ïaroh ïa ka jingdon bynta kaba khraw ba la aiti da ka BRDC bad ka NECU ban pynbha ïa ka jinghiar pateng ka kam sumar naduh ki longshwa manshwa.
U la banjur halor ka jingdonkam ban pynshlur ïa ka R&D ha ka kam ai dawai kynbat ka ban pynïasoh lang ïa ka jingnang jingtip haba ïadei bad ka jingai jingsumar kaba ju long manla ka sngi.
Katba na ka liang Gunanka DB, IFS, Additional Secretary ka sorkar jylla bad Member Secretary ka BRDC, la batai shaphang kiba bun ki jingsdang ba la shim da ka BRDC ha ka ban pynbha ïa ka rukom sumar naduh ki longshwa manshwa.
Kane ka prokram ai jingithuh ka long ka jingpyrshang ban pynsah kynmaw ban pynneh ïa ka jingnang jingtip ka rukom sumar Khasi kaba la noh synniang bha ha ka jingai jingsumar khamtam ha ki thaiñ nongkyndong.
Ki nongsumar kiba la ïoh ki jingithuh ki la shah pynkup burom ruh ha kane ka prokram, kaba long kum ka dak bad ka sienjam ban ithuh ïa ki rukom sumar ki trai ri trai muluk.