Ka jingbthat jubor la ka jingim ka dei kaba lah ban sakhi hapdeng kiba bun ki briew. Ka jingbthat jubor la ka jingim ka dei kaba lah ban jia ha baroh ki rta jong ka jingim briew, ne wat apdeng ki kynthei bad shyngrang ruh kumjuh.Ka jingbthat jubor la ka jingim ka dei ka jingshah ktah kaba shyrkhei ha ka liang ka koit ka khiah ki riew paidbah, hynrei ka dei ruh ka jingma kaba lah ban ai jingïada lada shimkhia ha ka por kaba biang. Kham bunsien hi kane ka jingbthat jubor la ka jingim ka dei kaba wanjia na ka daw ka jingshah banbor ka jingmut jingpyrkhat.
Bunsien ngi ju shim ba ka jingbanbor ka jingmut jingpyrkhat bad ka jingbthat jubor la ka jingim ka dei kaba lah ban ktah tang hapdeng kito kiba ym shym la lah ban poi sha ka thong, kiba duk ne kiba ym lah ban jop ki kam kiba ki leh ne thmu. Hynrei kumba la kdew haneng, ka jingkhuslai bad ka jingbthat jubor la ka jingim kam shym la jied satia ïa ki lanot jong ka halor ka jingkhmih katkum ka jingpynpaw ha ka imlang ka sahlang bad ka ïoh ka kot, ka niam, ka jingheh ne rit ka rta ne ka longtynrai jong ki briew. Haba ka wan ka dei kaba lah ban sakhi ruh wat hapdeng kito ki briew kiba ym kynjoh sha ka thong.
Ha ka jingshisha kaei kaba ki briew ki pynpaw ïalade sha ka pyrthei ki paw ba don khyndiat ka jingïadei bad ka long ka man hapoh bad ka bor mut bor pyrkhat jong ki. Ka jingshah ktah jong kiba haïing hasem bad kiba ieid ba jan jong kito ki briew kiba bthat jubor la ka jingim ka dei kaba lah ban buh jingkylli bad buh ka jingsngew bynñiaw kaba khraw tam. Hynrei hapdeng kine baroh, ka jingbthat jubor la ka jingim ka dei kaba lah ban ai jingïada- ka jingtip halor ki dak jingmaham bad ki dak jingshitom ba paw, lah ban shim ki sienjam kiba donkam halor ka jingma kaba lah ban mih bad lah ban khanglad halor kane ka jingjia kaba ktah bad sngew buhkhoh.
Ki dak kiba paw hapdeng kito kiba don jingmut ban bthat jubor la ka jingim :
Ka jingkylla ka rukom long : Ka jingkylla kynsan ka rukom long ka dei kaba lah ban long ka jingpyni dak jingmaham- kum u briew uba bunktien u sngap jar jar kynsan bad pyrshang ban buhrieh ïalade, ne u briew uba paw ba khlaiñ ka jingmut jingpyrkhat u paw ba shah ktah bad long jem wat ha ki jingjia kiba rit ba ria.
Ka jingsangeh noh baroh ba ïadei bad ki kam ki jam : Ka jingsangeh noh baroh ki kam ki jam kum ka jingkhang noh ka account ha ki bank, ka jingpynkylla halor ka jingai bhah ne ka jingsiew noh baroh ki ram khnang ba kiba haïing hasem kin ym kynduh jingeh.
Ka jingai khublei khatduh : Ka jingai khublei khatduh ne ka jingleit kynduh kyrpang ïa ki paralok barim bajah ne thoh ki shithi, bad ai khublei kyrpang ruh wat ïa kito ki briew kiba ïatrei ïaktah lang.
Ka jingsangeh ban pyndonkam ki social media : Ha kine ki sngi kiba mynta ka jingpyndonkam ki social media ka dei kaba la pyndonkam jan baroh. Ki dei kiba paw la ka jong ka jingim lynba kine ki social media. Lada ki briew ki don hapdeng ka jingkhih khuslai bad don jingmut ban bthat jubor la ka jingim, ki lah ban sangeh halor ka jingpyndonkam ki social media ne thoh ei ei.
Ka dak ba paw halor ka jingpyrshang ban pynmynsaw ïalade : Ka jingpyrshang ban pynmynsaw ïalade bad lah ban sakhi lyngba ki dak ot ha ki bynta jong ka met. Kane ka lah ban urlong khamtam ha ki bynta jong ka kti. Ki don ruh kbia ju pyrshang ban pynmynsaw ïalade da kaba dih buaid bad leh ki kam kiba buh jingma. Ka jingthmu hangne ka dei ka jingpyrshang ban klet noh ki jingshah ktah ba u briew u lah ban mad halade shimet.
