Ka long kaba donkam haduh katta katta ban pynkhlaiñ ka jingïatreilang ki Pulit ka jylla bad ki BSF ha ki bynta khappud khnang ban lah ban khanglad ïa kino kino ki kam tuh kam thiem, ki kam thombor, ki kam khaïi beaiñ kiba jyllei bha ha ki bynta khappud. Hooid ym lah ban len ka don ka jingïatrei lang hi hapdeng ki ar bor pahara hynrei ka donkam ban dang pynkhlaiñ shuh shuh namar ka Meghalaya ka dei ka jylla kaba jrong tam ki bynta khappud bad ka Bangladesh namar ka jingjngai ki bynta khappud bad katei ka ri ka long haduh 443 Km. Hooid na kane kumba 400 Km la dei ker sainar shiah hynrei sa kumba 43km kaba ym pat dep. Nalor ka ka dei ka jylla kaba jrong bha ki bynta khappud ka jinglong jingman jong ki jaka ha khappud ruh ki long lum long wah, sharing,khohruh khohram bad ka buh bha ïa ki bor pahara Border Security Force (BSF ) ha ka jingeh ban lah ban pahara pyrkhing bha khamtam lada duna ki bor pahara.
Na kane ka daw la ïohi na ka por sha ka por ki khar Bangladesh ki ïoh ban rung suk shapoh u pud u sam ka Meghalaya bad leh ïa ki kam pyntriem kam tuh kam thiem bad kiwei kiwei ki kam runar. Dang shen ruh kumba 6 haduh 8 ngut ki runar na Bangladesh ki la ïoh ban rung sha ka shnong Rongdangai kaba ha South West Khasi Hills bad leh ïa ki kam pyntriem da kaba ki la rah ïa ki tiar pynmynsaw bad mut ban rahbor ïa uwei u rangbah sha Bangladesh ban pyniap ïa u. Hynrei donbok u la ïoh phet noh na ka kti jongki tangba wat la katta ruh ki dang ïoh hi ban pynmynsaw ïa u.
Kane ka jingïoh rung jong ki runar na Bangladesh ka dei ka jingïoh shim kabu jongki ïa ki jinglong ki bynta khappud ka Meghalaya namar ka long kaba eh haduh katta katta ïa ki BSF ban lah ban ïohi ne pahara lut. Ka long kaba suk ban pahara kum ha ki bynta khappud ka Assam bad kiwei kiwei ki jylla namar lah ban ïohi da ka dorbin wat sha jngai ruh hynrei ha Meghalaya ka eh namar ym lah ban ïohi namar ka jinglong jingman ki bynta khappud kim long ryntih hynrei long lum long wah. Hooid ym lah ban len ki BSF ki la pyrshang hi katba lah ban pynkhlaiñ ïa ka jingpahara ha khappud hynrei wat la katta ruh ki khar Bangladesh ki dang ïoh beit ban rung tuh. ïa kine la ju tip hadien ba la ïoh kem ïa ki khar Bangladesh wat sha kiwei ki jylla ruh ba ki sa phla ba ki ïoh ban rung sha India lyngba ki bynta khpapud ka Meghalaya.,
Related Posts
`Kumta kaei kaba donkam ka long ba dang donkam ban pynbun shuh shuh ïa ki bor pahara ha ki bynta khappud khnang ba kin ym hap ban ïaid jngai ban pahara namar lada ki hap ban ïaid jngai ne bun spah metre ki khar Bangladesh ki la dep bam lyndet lut ha khappud bad kumta kin ïoh ban shim kabu beit ïa kitei ki jingkhohruh khohram jong ki bynta khappud. Nalor kane ka dang donkam ruh ban nang pynkhlaiñ ka jingïatrei lang jong ki BSF bad ki bor pulit ha ki bynta khappud. Hooid ym dei ba ong ba kam don ka jingïatrei lang ka jingïatrei lang ka don beit hapdeng ki ar bor pahara hynrei kaba kongsan ban dang pynkhlaiñ khamtam da kaba ïa pashat ki jingai jingtip mar kylliang haba ki ïoh jingtip ba ki khar Bangladesh ki don ha kata kata ka jaka.
Sa kawei ruh ka jingïatrei lang ka dei ban nang khlaiñ shuh shuh hapdeng ki BSF bad ki BGB jongka Bangladesh ruh. Namar haba don ka jingïatrei lang ki kynhun runar kin ym ïoh lad ne nud ban shim kabu ban rung ban mih na ki bynta khappud ka India ne Bangladesh ruh. Hooid mynshwa ka la khlaiñ bha ka jingïatrei lang ki ar kynhun pahara khappud jong ki ar ri hynrei la ïohi ba ka la kham synjor ne tlot hadien ba la kylla ka jingsynshar ha Bangladesh ruh. ïa kane donkam ban ïai pynkhlaiñ khnang ban lah ban tehlakam ïa ki kam runar ha ki bynta khappud.
Nalor kata ka dei ruh ban don ka jingïatrei lang kaba jan hapdeng ki BSF bad ki paid khappud ruh namar ki dei ki paid khappud kiba kloi ban tip bad ïohi mano ba wan rung sha u pud u sam ka India na Bangladesh. Namar lada khlaiñ ka jingïatrei lang ki tang shu ïoh jingtip kin ai jingtip mar mar sha ki bor pahara BSF khnang ba kin ïoh ban leit thwet bad kem ïa kita ki briew kiba rung beaiñ sha u pud u sam ka India. Ka jingïoh wan rung ki runar na khappud ka pyntroiñ ïa ka ïoh ka kot jongka ri India namar bunsien haba ki rung ki rung da ka jingthmu ban pynrung ïa ki mar beaiñ kum u drok, ka pisa thok, ki jingdih pynbuaid bad kiwei kiwei ki tiar. Ka jingïoh rung ka pisa thok sha India ka ktah bha ïa ka ïoh ka kot jongka ri. Kumta khnang ba kine ki runar kin ym ïoh rung ban pyntroiñ ïa ka ri bad ka thaiñ shatei lam mihngi hi baroh kawei ka donkam ka jingïatrei lang jong ki paid khappud.