Shillong, Nohprah 03: U State President ka AITC bad u MLA ka Nongthymmai u Bah Charles Pyngrope u la banjur halor ka jingdonkam ban buh ïa ki rehabilitation centre ha manla ki district jong ka jylla ban khmih ïa ki jingeh ha kaba ïadei bad ka jingjyllei jong ki kam khaïi bad dih drok ha ka jylla.
Haba kren sha ki lad pathai khubor ha ka sngi baar u Bah Pyngrope u la ong, “Nga tharai ba ngi la dep ban ïakren ïa kane kam hapoh ka ïingdorbar Synrai ba dang shudep bad ngi la ai jingmut ïa ki jingeh ba la wanrah da ki nongshong shnong bad ïa kane la wanrah ruh da ka liang pyrshah, haba la pynpaw ïa ka jingdonkam ban buh ïa ki centre ha manla ki district ban ai ki jingsumar ïa kiba dih drok bad kumjuh ruh ïa kiba la kyrni ha ka kam dih drok. Ngin ym lah ban shaniah beit tang ha ki jaka sumar ba shimet. Kane ka dei ka phang kaba hap ban shim khia bha na ka liang ka tnat bad ka sorkar hi baroh kawei.”
U la ong ba ka sorkar ka donkam ban wan shakhmat bad ba dei ban tei kham kloi ïa ki jaka sumar naba ka long kaba donkam ban pynsah ïa kiba dih drok la kumno kumno hapoh ka shi snem.
Haba ïaroh ïa ki sienjam ba la shim da ka sorkar ha kaba ïadei bad ki lad ai jingsumar ïa kiba dih bad kiba la kyrni ha ka jingdih drok u Bah Pyngrope u la ong, “Ka donkam ban leh kloi ïa kane ka kam da kaba khmih ruh ïa ka jingkiew sted kiba dih bad khaïi drok ha ka jylla.”
Haba kylli halor kane, u MLA ka Nongthymmai u la ong, “Nga ïohi ba ki la don ki sengbhalang kiba trei hok bad nga ju don ruh ka jingïatreilang bad ki, naba ki la pynlut nalade hi khlem da la ïoh ki jingïarap na ka sorkar jylla.”
“Hynrei nga ong ba ki don ki kynhun sengbhalang ha Shillong bad baroh kawei ka jylla kiba la trei khlem ka pisa ban ïakhun ïa kane ka jingeh.” “Ki la don ruh ki NGO kiba la wanmih sha nga ban pan jingïarap ha kaba ïadei bad ka kali. Ki la ong ba ki la ïoh bat ïa kiba la kyrni hynrei kumno ngin kit ïa ki. Ki don kiba la jur ka jingkyrni bad la don ruh kiba la shah pynkit ha ki jaka sumar kiba don marjan bad kumta ki donkam ïa ka kali,” ong u MLA ka Nongthymmai.
Halor kane u MLA ka Nongthymmai u la ong ba u la kyntu ïa ka kynhun ba dei ban don noh ïa kawei ka kali ka ban mang napoh ka SRWP scheme ha une u snem khnang ban ai lad ïa ki ban trei ïa kane ka kam hynrei ban trei tang marwei kane kam long kaba suk,” u la bynrap.
