Don sa 3 ngut ki shynrang briew kiba ïadon lang bad ki shijur ha ka por ba kiew na Nongriat sha Mawlakhiat

Shillong, Jylliew 7 : Kaba kham pynlyngngoh shuh shuh ïa ka jingjia ïa ki shikurim kiba na Indore ha kaba u Raja Raghuvanshi u la shah pyniap bad ka kurim jongu pat ka Sonam ka dang jah rngai haduh mynta ka long ba uwei na ki Nongïalam Lynti ïa ki nongwan jngohkai pyrthei u samla Albert Pde u la ïathuh mynta ka sngi ba u ïohi da lade ba ki don sa lai ngut ki nongwan jngohkai pyrthei kiba na shabar jylla kiba ïadon lang bad kine ki shijur katba ki dang kiew ïa ki Mawkyndon ba 3000 tylli na Nongriat sha Mawlakhiat ha ka 23 tarik por 10 baje ei ei mynstep.
Kine ki shijur ki la wan poi sha kane ka jylla naduh ka 22 tarik bad pynïeng ïa ka Scooty jongki ha jaka pynïeng kali ha Mawlakhiat hashwa ba kin hiar sha ka jingkieng Jri ha Nongriat lyngba kitei ki 3000 tylli ki mawkyndon. Naduh ka 23 tarik ki la jah rngai bad ïa katei ka scooty ba ki shu shim wai la lap na Sohrarim ryngkat bad u shabi.
U bah Albert uwei napdeng ki Nongïalam lynti ïa ki nongwan jngoh kai ha Mawlakhiat u la ïathuh ba u ïa kynduh ïa kine ki san ngut briew kynthup ïa kawei ka kynthei kaba ïaid kham shadien eh na ki rangbah ka pynpaw ba kine ki shijur ki la ïa kynduh paralok ha ka por ba ki wan phai kata ha ka por 10 baje ei ei.
“ Nga ïa kynduh ïakine ki san ngut ki briew kynthup ïa kawei ka kynthei kaba ïaid kham shadien na ki rangbah bad kine ki rangbah baroh saw ngut ki ïa kren da ka ktien Hindi” ïathuhu Pde.
Hynrei u la ïathuh ba um sngewthuh ki ïa kren aiu ba halor kaei ruh namar um sngewthuh ïa ka ktien Hindi lait noh tang ka ktien Khasi bad Phareng.
U Pde u la ïathuh ba u la tyrwa ruh ba un ïalam lynti ma u ïa ki ha ka 22 tarik hynrei ki la kyntait. Kine ki shijur ki la khot ïa u Bha Wansai ban ïalam lynti ïa ki sha Nongriat ha kaba ki ïasah miet ha ka Shipara Homestay shwa ban kiew noh ha ka step kaba bud khlem da don nongïalam lynti shuh ïaki.
“ Ki la kyntait ba ngan long nongbtin lynti ïa ki ha kapor ba ki wan phai bad ha ka por ba u pat u poi ha Mawlakhiat u lap ba ka scooty jongki kam don shuh bad ïa kine kiei kiei baroh ula dep phla lut ha ki pulit.
Haba la ïoh jingtip ia ka jingjah rngai, naduh ka janmiet jongka 23 tarik Jymmang hi ki pulit ki la thung ïa ki trai shnong kato ka thaiñ ryngkat ki VDP ban sdang ka jingwad bad da ka jingwad ba khlem shongthait la lap ïa ka met iap jong u Raja napoh riat ka Weisawdong ha ka 2 tarik Jylliew. La lap ruh ba ka sati ksiar bad u jingdeng na ryngdang jongu ki la jah. Hadien shisngi la lap sa kawei ka wait ba la sop snam na jan katei ka jaka . Arsngi hadien la lap sa ïa ka jaiñ jri ba bit snam kaba la phong daka kurim u Raja kat kum ka jinglap ki pulit na ki CCTV na jan ka shnong Mawkma.
Na kawei pat ka CCTV kaba na kawei ka Homestay ha Sohra kaba kine ki shijur ki buh ïa ka pla jongki ka pynpaw ba ka Sonam ka phong ïa katei ka jaiñ jri.