Don ki shnong ba shlei kai ka um, don ba hap thied, dei ban kitkhlieh ka tnat PHE: Bah Adelbert

Shillong, Lber 19: U MLA ka VPP napoh ka 17 North Shillong Konstituensi u Bah Adelbert Nongrum u la ong ba kum nongmihkhmat jong ki paidbah u la ïai kyntu ïa ki tnat treikam jong ka sorkar jylla kum ka tnat sam um ne ka PHE bad kumjuh ruh ka Shillong Municipal Board ba kin sngewbha ban trei minot namar ka kamram ka long ba dei ban ai ka jingshakri ka babha ïa ki paidbah khamtam ha kaba ïadei bad ka umbam umdih.
U la ong ba ka um ka dei ka jingim bad ka jingïap jong ki paidbah bad khlem ka um yn ym lah ban im hynrei khlem ka bam la kumno kumno dang ïa lah ban im katto katne.
“Ki tnat kin ym dei tang ban ai daw ba ka dei ka por tyrkhong, hynrei ki tnat sorkar ki don ka bynta kaba khraw bad ki hap ban shim ruh ïa ka jingkitkhlieh, khamtam ha Sor Shillong la bun tylli ki Snem ngi la mad ïa kane ka jingeh lano kum ki Nongshong shnong, ngin ïoh ïa la ka hok, ki la dei jingshisha ban kham pynthikna ba ka um ka la dei ban kham pynbha, bad ki tnat kiba dei khmih ïa ka umbam umdih kum ka SMB bad PHE ki dei ban phah ki ba dei sha field ban peit khmih ba ki don ki jaka ba ka um ka shlei bad pahuh hynrei ki don pat ki jaka ba ki longïng ki hap ban thied ïa ka um,” ong u Bah Adelbert Nongrum.
U la ong ba baroh ki paidbah ki tip shai bad ka tnat PHE kadei ban pynbiang ka Source bad ka Municipal ka dei ban pynbiang ka jingsam (Distribution) ïa ka um, kumta u la kyntu ba ki dei ban trei hok bad ban ïatreilang na ka bynta ka bit ka biang jong ki paidbah ym ban ïa kynnoh ïa kawei ka tnat ïa kawei pat ne ban ïa thet kti, ki dei ban pyndep hok la ka kamram bad ka deiti ka jingkitkhlieh.