Ka sienjam ba la shim da ka sorkar ban pynkynriah noh ïa kiba sah ha Ïew Themmawlong kaba ju tip baroh shi katta kum ka them-metor ka don ka jingkyrmen ba yn lah ban pynurlong noh shwa ka elekshon MLA kaban long ha u 2023. Lada na ka liang ka sorkar jylla hi ka lah ban pynurlong ïa kane, lehse kan ïoh ïa ka burom kaba khraw ym tang na ki paidbah ba kyrshan ïa ka sorkar hynrei wat na kito kiba ju beiñ ju khoh lane na ki kynhun liang pyrshah ruh baroh.
Lehse lada ka sorkar shisha ka lah ban pynkynriah noh ïa ki khlem artatien ki party baroh kiba don ha ka sorkar Meghalaya Democratic Alliance ki nud ban kob ba ki la don bynta bad ka sorkar kaba trei na ka bynta ban weng ïa ka jingeh ba kum ka Jaidbynriew hi ki la kwah ba kan urlong.
Na ka liang ka sorkar ki la trei borbah ban ïoh pynkynriah noh ïa kitei ki briew na katei ka jaka sha kawei pat ka jaka ba la pynkhreh kyrpang kumta ka don ruh ka jingkhmih lynti ba katei ka jingpyrshang ruh kan ym shimpor shuh kumba ki nongshong shnong ka jylla ruh ki la khmih lynti la slem slem ban kan seisoh noh. Lah ban kdew hangne ba kane ka jingtyrwa ka sorkar ne ka jingpyntip ka sorkar ka long hadien ba ka High Level Committee (HLC) kaba la thung da ka sorkar, hadien ka jingïakhih kaba jur ban dawa pynkynkynriah noh ïa kitei kiba sah ha katei ka jaka, ka la ai jingmut sha ka sorkar ban pynkynriah noh ïa ki na katei ka jaka, ïa kaba la shimti noh da ka tnad Urban Affairs hadien bala siew 1 klur tyngka sha ka Hima Mylliem, kaba dei ka trai jong kane ka jaka.
Kumban shu phaidien biang, ka jingtyrwa jong ka sorkar ban pynkynriah noh ïa ki na katei ka jaka, na ka liang ka Harijan Panchayat Committee (HPC) ka la mynjur ban mih noh tang halor ka nongrim ba lada ka sorkar ka pynïoh haki ïa ka jaka kaba long hapdeng Sor. Na ka liang ka sorkar ka la aiti ha ka Tnad Urban Affairs ban pynkhreh ïa ka Blue Print ne ka dur ka dar jong kane ka jaka sah ba thymmai ki Harijan.Dei ha u bnai Jymmang jong ka snem 2018, kumba ar bnai tam hadien ka jingshimti ka sorkar MDA ïa ka jingsynshar ha ka jylla, la bthei puk ka jingïakhih pyrshah ïa ki briew kiba sah hangtei haduh ba ka la pur sted bad ki paidah na kylleng ki la mih sha Motphran bad kiwei kiwei de ki jaka ban pynlong ka jingïakhih kaba la neh bad sngi bad miet haduh bun bun sngi.
Ha katei ka por namar ka jingjur ka jingïakhih, ka sorkar kala pynjari da ka korphiw ha kine ki bynta kiba jur ka jingïakhih ha kaba la poi ruh haduh u pud ba la hap ruh ban khang sa ïa ki kor internet bun sngi kynthup lang ïa ka korphiw. Bad dei ruh na ka daw jong katei ka jingjia, ba ka surok kaba ju ïaid kali na Ïew Themawlong ban mih sha Khyndailad la khang noh bad la buh bad pynap ruh da ki bor pahara miet la bad step naduh katei ka por bad kane ka la ïai bteng tad haduh mynta mynne.
