Shillong, Risaw 29 : U heh ka All India Congress Committee ba dei peit ïa ka Meghalaya u Dr A Chellakumar ha ka sngi Balang u la kam ba ki la don bun bha ki nongïalam na ki party ba don ha ka liang synshar kiba la pynpaw ïa ka jingkwah ban pynïasoh noh sha ka Congress bad shen yn sa pdiang burom noh ïa ki.
“Ki la don bun bha ki paidbah na ki seng sain pyrthei kiba don ha ka liang synshar ki la dep ban pynsngew ïa ka jingkwah jong ki ban pynïasoh biang bad ka Congress,” la ong u Dr. Chellakumar haba kren bad ki lad pathai khubor. “Kumta ha ka por kaba biang, uwei hadien uwei, ngin sa pdiang ïa ki bad ha kata ka por phin sa tip baroh shaphang kata.”
Kane ka jingkren jong u heh Congress ka dei ha ka sngi ba ki pdiang burom ïa u MLA barim ka Rangsakona u Zenith Sangma uba la rai ban wanphai biang sha ka Congress.
“Mynta ka sngi, ka long ka jingkmen kaba krhaw ban ïoh pdiang sngewbha ïa u dkhot barim jong ka iing jong ngi uba la noh synniang haduh katta katta sha ka seng Congress,” la ong u Dr. Chellakumar. “Nga pdiang sngewbha ïa u Zenith Sangma sha ka seng Congress.”
Shuh shuh u la ong ruh ba u Zenith u la mih noh na ka Congress tang shipor hynrei mynta u la sngewthuh ba dei tang kane ka party ka rynsan kaba bha tam.
Na ka liang u President ka party, Bah Vincent H Pala u la ong ba baroh ki nongkren ki la pynpaw ba ka Congress ka dei tang ma ka ka party kaba ju ïada, pynneh pynsah, bad kyntiew ïa ka rukom mane Blei laitluid ha India. “Haba ka Congress ka tlot, ka imlang sahlang jong ngi ka tlot.”
