Shillong, Naiwieng 20 : U Myntri ka Sorkar jylla, Bah Kyrmen Shylla ha ka sngi Balang u la ïathuh ba ki don bun bha kiba aplai na bynta ka Mining Lease lane ka jingpan jingbit ban tih dewïong kaban pyni ba ki la long kiba la biang ban sdang noh ïa ka kam tih dewïong da ka juk stad ha ki jaka kiba hapoh 100 hectare.
Haba kren bad ki lad pathai khubor, u Bah Kyrmen uba dei ruh u MLA ka Khliehriat u la ong ba la katei ka jingheh kaba hapoh 100 hectare ka la biang ne kam ïahap bad ka Meghalaya, ïa kane kin sa lah ban tip tad haduh ba ki la don kiba la sdang ïa katei ka kam tih dewïong katkum ka juk stad lane da kata ka scientific mining.
Dang ha u Naitung mynta u snem, ka Meghalaya State Coordination Committee of the Coal Owners, Miners, Exporters, Transporters and Dealers Forum (MSCCCOETDF), ka la dawa na ka sorkar jylla ba kan pyndam noh ïa ka kyndon ne Standard Operating Procedure kaba ki kynnoh ba ka long kaba beaiñ kaba ïadei bad ka jingai laisen ne ka mining lease na bynta u dewïong ha ka jylla.
Katkum katei ka SOP la ong ba ka jingai ïa ka laisen lane ka mining lease ban tih dewïong ha ka jylla kadei ban long ha ki jaka kiba hapoh 100 hectare.
Na ka liang u Myntri haba kren halor kane ka phang u la ong ba ka thong jong ka sorkar jylla hi ka long ban peit ïa ki paidbah, ki nongtrei par, nangta ïa kito kiba don bynta lang ha ka kam bad baroh kiba donkam ïa ka jingkyrshan. “Hynrei ïa mynta hi, bun ki la aplai hapoh kane ka thup bad kane ka pyni ba bun ki la kotbor ban leh.”
Shuh shuh u Bah Kyrmen u ong ruh ba ki don ka jingkyrmen ba ka Sorkar Jylla hapoh ka jingïalam jong u Myntri Rangbah Conrad K Sangma, kan sa pynthikna shen ïa ka jingsdang noh ka jingtih dewïong katkum ka jingstad saïan ha Meghalaya.
