Dkoh treikam ka Veterinary ha shnong Nonglang bym pat thung lut ka sorkar ïa ki nongtrei

Nongstoiñ, Nailur 24: Ka jingtreikam ha ka ophis veterinary kaba don ha ka shnong Nonglang West Khasi hHills kaba hap hapoh ka Mawshynrut Civil sub division, haduh kine ki sngi ka dang dkoh bha namar ba ka sorkar kam shym pat la thung lut ïa ki nongtrei ha katei ka jaka sumar ïa ki jingri.

Ha kaba ïadei bad ka jingdeh ka rukom treikam ha katei ka jaka sumar ïa ki mrad, ki nongshong shnong katei ka thaiñ haba pyntip ha u nongthoh khubor ki la ong ba ha katei ka ophis ki don ki nongtrei kiba la dep  thung, hynrei kim pat lah ban pynbiang ïa ka jingdonkam jong ki paitbah nongri jingri namar ki nongtrei kiba la kham tbit kim pat don.

Kumta na ka liang ki paitbah katei ka thaiñ ki la kyrpad ïa ka sorkar ba ka dei ban thung noh ïa baroh ki nongtrei ha katei ka jaka sumar ïa ki jingri jingdup. Namar bun bah ki nongshong shnong ha katei ka thaiñ ki dei kiba ri jingri kum ki syiar, ki blang, ki sñiang, ki masi. Kumta lada ki jingri jingdup ki kem pang kin lah ban pan jingïarap kumno ban sumar ïa ki.

Ki la ong ruh ba ka jingdon tang katto katne ngut ki nongtrei ha katei ka jaka sumar jingri ruh ka la ïarap shibun ïa ki nongri jingri. Lada dei ba ka sorkar ka la pynbiang lut ïa baroh ki nongtrei kiba dei ban trei ha katei ka jaka, kan da long ka jingkyrkhu kaba khraw ïa ki paitbah ka thaiñ.

Namar lada kem pang ki jingri jingdup kum ki syiar ki sniang bad kiwei kiwei ki jaka sumar bad ai dawai ïa ki mrad ki don tang ha Riangdo bad Athiabari. Kumta ba kin leit shim dawai ne leit phah sumar kat shaduh kitei ki jaka kan shim por bha bad kan ktah ruh ïa ka por, ka jinglut jingsep ha ka leit ka wan.

Hynrei lada ki nongtrei ha Nonglang ki la don lut kan ym bam por than, namar kam da jngai wat ban leit da ka kjat ruh ki dang lah ban poi tang hadien katto katne por.