New Delhi, Ïaïong 19: Uwei u briew ba la 34 snem ka rta uba na Uttar Pradesh na ka shnong Ghaziabad u la shim ïa la ka jong ka jingim da kaba dih bad u la khlad noh hadien arsngi hadien ba u la shah sumar ha kawei ka jaka sumar ha katei ka shnong. U Mohit Tyagi, uba trei ha kawei ka jaka trei ki riewshimet bad uba shong ba sah ha ka thaiñ Ghaziabad Modinagar, u la kynnoh ïa la tnga bad ki bahaïing jong ka, ba ki la pynjynjar ïa u, ïa kane u la thoh ha ka shithi ha shwa ba un shim ïa la ka jong ka jingim.
U para jong u Mohit u Rahul Tyagi, u la kam ba u la shah pynjynjar ha ki bor pyrkhat da kaba kynnoh ba ka tnga jong u ka la pynjynjar ïa u ha ryngkat bad ka ïing ka sem jong ka. Na ka liang ka ïing ka sem jong u, ki la ujor ha Modinagar police station, ha kaba ki la pynpaw ïa ka kyrteng jong ka tnga jong u, ka Priyanka Tyagi, u para jong ka u Puneet Tyagi, ka Neetu Tyagi, u mama jong ka u Anil bad u Vishesh Tyagi.
Ïa kane ka case la register bad ka jingtohkit halor kane ka la dang ïaid, ïathuh ki pulit. U Mohit ula ïathoh ïa ka Priyanka, kaba dei na Sambhal district, ha ka 10 tarik u Nohprah, 2020. Kane ka dei ka kurim baar jong u Mohit. Kine ki shijur ki la don u khun u Samarth Tyagi ha u Risaw 2021.
Katkum ka jingïathuh ka ïing ka sem u Mohit, ka jingïadei jong ki, ka la sniew tang hapoh shi bnai hadien ka jingïathoh jong ki. Ki jingkynnoh ki mih ba ki la don bunsien ki jingïania, ki jingkynnoh ban aiti sha ka aiñ bad ka jingpynjynjar ha ka bor pyrkhat. Ha ka shithi ha shwa ba un dkhat noh ïa la ka jong ka jingim, u Mohit u la sam ïa kane ka shithi dkhat jingim sha kiba bun ki paralok bad ki bahaïing ha ka WhatsApp ha shwa ba un dih ïa ka bih ha ka 15 tarik mynta u bnai.
Ha ka shithi la kynnoh ba ka tnga bad ki bahaïiing ka sem jong ka, ki la pynpoi kha ïa u tang da ka jingpyrkhat ban kjit pisa kaba kynthup ruh da ka case dowry.
