Diaw ka JNC ba duh bording ar taïew ha dong Wailong Shnong Sutnga, ka dong ba don ka CHC

Khliehriat, Naitung, 02: Ka Jaiñtia National Council ka pynpaw ka jingsngew khia halor ka jingduh bor ding kaba la kot mynta sha ka ar taïew ha ka dong Wailong ha shnong Sutnga, East Jaiñtia Hills District bad ha kane ka dong ka don ruh ka jaka ai jingsumar, ka CHC-Sutnga kaba la shah ktah lang ha kane ka jingduh bor ding kaba la buh jingeh ïa ki nongtrei bad kumjuh ruh ïa ki paidbah kiba pyndonkam da ka bor ding ha kiba bun ki bynta.
Halor kane ka jingduh bor ding ka Jaiñtia National Council mynta ka sngi ka 2 tarik u naitung hapoh ka jingialam u Information Secretary jong ka seng, u bah Meban-teilang Sukhlaiñ, ki la leit ban iakynduh ïa u Executive Engineer jong ka tnat bor ding ka MePDCL Khliehriat Division bad ki la pan jingpynshai ban dup tip halor kaei ka daw ba ka dong Wailong ka duh bor ding, na ka liang u EE u la iathuh ba ka daw jong ka jingduh bor ding ka dei namar ka jingduh ne sniew ka machine transformer ha katei ka jaka bad ka jingsniew jong ka machine transformer ka dei na ka daw ka jingther jur palat u slap bad ka lyer ha kine ki sngi ba la leit, halor kane ka seng ka la kynthoh jur ïa ka tnat bor ding da kaba ong ba “haka por lyiur ai daw ïa u slap bad haka por tlang pat ai daw ba duna um, katba ïa ka bai bor ding pat ym ju don jingmap”
Na ka liang ka seng ka la kyrpad bad kyntu ïa u EE ban buh bujli noh da kawei ka machine transformer ha kaba na ka liang u EE ruh u la kubur ba ka la donkam hi ban buh noh da kawei ka machine bad ong ruh ba na ka liang ka tnat treikam ka la dep leh ïa kba donkam bad kular ruh ban phah kloi noh ïa ki kaiphot sha ki bor kiba halor ba dei ban ai noh da u transformer ba thymmai khnang ban ioh leh ïa kaba donkam eh hynrei la ong ba haduh mynta ka tnat kam pat ioh iaka jubab.
“Shuh shuh u EE u la iathuh ba na ka liang jong u, u lah dep ruh ban phah jingthoh sha ka ophis jong u Chief Executive Engineer naduh kine ki taiew ba lah dep ha kaba ïadei bad ka jingpan ïa ka machine transformer ba thymmai ha ka dong Wailong hynrei haduh mynta ka kam ka dang sahteng ym tip na kaei ka daw” ong u kyrwoh na ka seng.
Kumjuh ruh na ka liang ka JNC ka kyntu jur ïa ka sorkar bad ïa ki bor kiba halor kiba dei peit iakane ka kam bor ding ba kin sngewbha ban shimkhia bad ban leh ruh ïa kaba donkam tam bad ym dei ban shu ai daw da kumne da kumtai.
“Kum ban shu pynkynmaw ba ka dong Wailong ha ka shnong Sutnga ka dei ka dong ka ba don ïa ka jaka ai jingsumar kaba heh, kata ka CHC kaba ju ai ruh ïa ka jingshakri ym tang ïa ka shnong Sutnga hynrei ïa ki phew phew tylli ki shnong kiba hap sha kito ki thaiñ, te lada kane ka jaka ai jingsumar ka shong umdum khlem don bor ding da ki taïew bad da ki bnai te katno ka jingshah ktah ïa ka rukom treikam jong ki nongtrei kiba don ha katei ka CHC kaba ju ai jingshakri ïa ki paidbah khamtam kiba ju peit ïa ka im ka iap jong u paidbah, na ka liang jong ka seng kan nym lah ban pdiang ïa kane bad kan sa nang ïai buddien biangkhnang ban wanrah ïa ka jingbit jingbiang jong ki paidbah bad ka jingshngaiñ ha ka leit ka wan namar ha kine ki sngi kiba mynta ka jingduh ïa ka bording ka wanrah bunsien ïa ka jingbym shngaiñ bad ka pynthut ruh ïa ki kam.ki jam ha baroh ki liang” pynkut u kyrwoh na ka JNC.