Man la u snem tang shu la poi ka por lyiur la jia beit ki jingtwa, jingshlei um, jingshah rong ki jingkieng, julor ki ïing ki sem kaba ju jia ruh ka jingduh ïaki mynsiem briew. Kane ka jingkhie bitar jong ka mei mariang ka dei na ka daw ka jingleh jong ngi hi ki khun bynriew kiba la shu pynjot pynpra ïa ka mariang ha ki bor ba rang ryngkhiang ka bneng. Ngi la shu ïa pom pathar ïa ki dieng ki siej, ngi la shu ïa pynjot ïa ki lum ki wah da ki jingtih maw pathar, ki jingtih shyiap, tih mawshun, tih dewiong bad ter ter. Nalor kata iïa ki phud wah ha sor bad khap sor la pynkylla dur noh namar la tei jingtei ha rud ki phud wah kaba la pynthut ïa ka lynti ïaid jong ka um ha ka por ba wan u lap bah. Kumta bunsien ka wanrah ka jingshlei um namar ka um kam ïoh shuh ban tuid laitluid kumta ka tang shu ïaid na kiwei ki jaka la jia ki jingshah pynjulor bad jingshah rong wat ki ïing ki sem ruh.
Teng teng haba shna ïing ym ju bishar bniah ïa ka jingshngaiñ tangba la ïoh shna ne tei lah biang tang shu wan ka lyiur, bad ther u lapbah jia sa ki jingtwa bad khyllem khyndew ha kaba bunsien wanrah ïa ka jingiap briew. Kine ki dei ki jingleh jongngi hi ki khun bynriew ba sa jia ka jingshah lyngshop ha ka mariang namar ngim sumar shuh ïa ka mariang kumta ka mariang ruh kam don jingmap tang shu la dei ka pali jongka ka leh katba ka mon. Lada ngi kwah ba ka mariang kan ïada ïa ngi ngi ruh ngi dei ban ïada ïa ka mariang baroh shisnem lynter khnang ban ïa im ryngkat ryngkat da kaba ïa shaniah mar kylliang kaba mut ngi shaniah ha ka mariang bad ka mariang ka shaniah ha ngi ki khun bynriew.
Lada ngi phai sha ki jingshah lyngshop ha ki bor mariang tang haduh mynta ki la don haduh 42 tylli ki shnong ha kylleng ka ri lum Khasi Jaintia bad Garo kiba la shah ktah ha ka jinglyngshop ka mariang. Ki don 36 tylli ki jingtei kiba la shah pynjulor bad ki don bun ngut ki mynsiem briew kiba la duh ei ïa ka jingim. Hooid ha ri lum Garo ha man la u snem ka ju jia beit ka jingshah tyllep ki ïing ha ka umsaw ynda la kiew bha ka wah Brahmaputra hynrei mynta u snem ym pat jia ei ei kat haduh mynta mynne.
Lada ngi phai pat sha ka surok bah NH-6 kaba ha ki thaiñ Sonapur, kane ka surok ka dei kaba ju pyndik beit man la u snem hynrei lyngngoh pat ba ki bor ka sorkar pdeng khamtam ka National Highways & Infrastructure Development Corporation Limited (NHIDCL) kam shym la shim khia ban peit kumno ban ïada na ka jingtwa ka khyndew ha katei ka jaka. Nalor ba ka surok ka sniew palat ha katei ka thaiñ mynta jur sa ka jingtwa, ki paidbah kiba leit ba wan na katei ka surok ki sahkut da ki bun bun kynta namar ym lait shuh ban ïaid tang shu la twa ka khyndew ha surok.
Ka NHIDCL ka la dei ban leh ei ei halor katei ka jaka da kaba thaw lad kumno ban weng syndon ïa katei ka jingeh ym tang shipor ar por hynrei kaba neh junom khnang ba kan ym buh shuh ïa ki paid nongleit nongwan ha ka jingeh bad ka jingma jongka jingim. Namar lada jia ba twa ha ka por ba dang ïaid ki kali khlem pep kan wanrah ka jingsngewsih beit lada shah btep ki kali ha ka jingtwa. Hooid ka sorkar jylla ruh ka la shim khia ban buddien ïa katei ka surok hynrei lehse ba dang jur palat u slap ba ka NHIDCL kam pat ïoh lad ban sdang ïa ka kam. Ka jingkyrmen ka long ba tang shu la rang u slap bad ai lad ka mariang katei ka kompani jongka sorkar pdeng ka la dei ban sdang noh ïa ka kam ha katei ka jaka khnang ba ki paidbah kin lait ban mad na ki jingeh ha ka leit ka wan jongki namar katei ka surok ka dei kaba pynïasoh ïa kiwei kiwei ki jylla shatei lam mihngi ka ri India.
