Dei ki samla ba lah ban ïakhun ïa ka jingkynrei u drok ha ka jylla : ong ki heh pulit ha NEHU

Shillong, Nailar 06 : Kum shi bynta ban ïa snoh kti lang bad ka Azadi ka Amrit Mahotsav, bad ban pynurlong ïa ka Nasha Mukt Bharat Abhiyan, ka program ba la wan rah da ka Ministry of Social Justice and Empowerment, jong ka sorkar Pdeng, Ka National Service Scheme Cell, NEHU ka la pynlong ïa ka prokram ba shisngi halor ka phang, “Menace of Substance Abuse” ba la pynlong ha ka 04tarik u Nailar, 2022 ha Multi-Use Convention Hall, NEHU.
Ïa kane ka programme la sdang da ka jingkren na u Dr. Virendra Kumar, u Myntri ka tnad Social Justice & Empowerment jong ka sorkar pdeng lyngba ka video conferencing, ha ryngkat ka jingdon lang ka Sonal V. Misra, IPS, Inspector General, North Eastern Sector, Central Reserve Police Force, Shillong kum ka kongsan bad ka Supriya Das, IPS, SP (CID), Meghalaya, Shillong kum ka symbud kongsan. Nalor kine la donlang ruh u Professor PS Shukla vice chancellor, Dr. M Khymdeit Program Coordinator NSS cell NEHU, professor R.L. Nongkhlaw, Dean Students Welfare NEHU, Kong Janet Pongener Convenor ka NSS, ki Programme Officer ryngkat ki NSS volunteer na ki college ba pher ha nongbah bad kiwei kiwei.
Haba kren kum ka kongsan, ka Sonal V. Misra Ka la ïathuh ba kine ki thain shatei Lammihngi jong ka Ri, ki la sdang kynrei kat nang mih ki sngi, ha ka pyndonkam ïa ki jingdih pynbuaid. Kumta, ka la kyntu ïa ki bor pynïaid shnong ba kin peit pyrman bha.
Shuh shuh ka la ong, ba ym dei ban lehrain ban kren shaphang ki jingsniew na ki jingdih drok ne jingpynbuaid, ki samla pule ki dei ban pynkhlain ka jingïasyllok paralok khnang ban lait na kine ki jingsniew. Ka ban jur ruh ïa ki samla ban don ka jingkitkhlieh, ban ïatreilang lang bad ki pulit ban pynduh jait ïa ki nongkhaii drok. Shuwa ban pynkut ïa ka jingkren, ka la pynshlur ïa baroh ki samla pule ki ba don ha kane ka program ban shim smai ban, “ong Ho-oid ïa ka jingim bad em ïa u drok.”
Ka symbud kongsan, ka Supriya Das, IPS, SP (CID), Meghalaya, Shillong, ha ka jingkren ka la ong ban pynduh jait ïa u drok, ka tnat pulit ka la sdang ban pyntreikam ïa 3 tylli ki lynti, kaba nyngkong ba ki pulit ka Jylla ki la pyrshang katba lah, ban tem ïa ka jingkynrei ki nongdie drok, bad kiwei kiwei. Ka ba ar, ka tnat Social Welfare ka la plie bun tylli ki counselling centre bad ki rehabilitation centre, bad kaba lai ki pulit ka Jylla ki pyrshang kat ba lah ban pyn khlain ïa ki prokram ai jingpynshai halor ki jingsniew u drok ha ki jaka paidbah ki skul, bad ki college.
Ka la pynshlur ïa ki samla pule ban mih shakhmat ban shim ïa ka jingkitkhlieh ban ai ka kti kamon ka kti kadiang ban pynduh jait syndon ïa une u jingsniew u ba pyn pait pynpra ïa ki iing ki sem jong kiba bun.
Ha ka jingkren jong u Vice-Chancellor, u Prof. Prabah Shankar Shukla u la pynpaw ïa ka jingsngwkhia ïa ki samla ha kane ka skulbah bad ïa ki samla ha ka Jylla hi, kiba ngat ha u drok.
U la ong ba ka thma pyrshah ïa u drok ka la sdang la slem, bad ka la dei ka por ïa baroh ban ïatylli lang kawei, khnang ban jop ïa kane ka thma. U la kyntu ruh ïa baroh ba kim dei ban khein bein ïa kito kiba ngat ha ki kynjri jong u drok hynrei ki dei ban ïarap ban ai mynsiem ïa ki ban wan phai biang sha ka lynti kaba dei.
Hakane ka program, u Bah Ivan B. Diengdoh , MPS, Deputy Superintendent of Police (Operation) u la ai jinghikai bad jingpynshai halor, “Ka jingkyrni ka jingdih kyiad bad ka jingpyndonkam bakla ïa ki jingdih pynbuaid ne ka Alcoholism and substance abuse”, bad bud da ka jingïakop thoh poster bad slogan competition halor ka phang “ONG EM ÏA U DROK, ne ““Say No to Drugs”, ïa ka ba la ïa shim bynta da kiba bun ki samla pule, bad bud da ki kyntien khublei na u Prof. RL Nongkhlaw uba la ai khublei ïa ka kongsan bad symbud kongsan na ka bynta ka jingpyllait por ka jong ki.