Dei ki paralok ha ka MDA ki ban rai la ngan hiar shuki ne em : CM

Shillong, Jymmang 24 : U Myntri Rangbah ka jylla u Conrad K Sangma u la ong ba dei tang ki paralok ha ka MDA kiba lah ban rai la un hiar shuki ne em namar da lade shimet ruh um lah ban shim rai halor kane ka kam.
“ Kan ym dei ka rai jong nga, ka dei na ki MLA kiba ïadon lang ha kane ka sorkar MDA kiba lah ban shim rai namar ki dei ma ki kiba la jied ïa nga kum u nongïalam jong kane ka sorkar” ong u Conrad
U Myntri Rangbah u la kren ïa kane kum ka jingjubab ïa ka jingdawa u MDC ka BJP na Tura u Bernard Marak la u myntri rangbah un aiti tohkit CBI ïa ka jingtwa ka Dome jong ka ïing dorbar Assembly ba thymmai ne un hiar shuki ma u kum u Myntri Rangbah.
Mynta ka sngi u Myntri Rangbah bad u Lamphang ka ïing Dorbar Thawaiñ bah Metbah Lyngdoh lem bad kiwei ki myntri ki la leit ban jurip da lade ïa ka jingtwa ka Dome bad hadien kane ha ka jingïalang ka HPC la rai ban aiti tohkit ne jurip bniah ïa kane ka jingjia da ka IIT.
U Myntri Rangbah u la kyntait ruh ïa ki jingkynnoh ba kane ka kompani ka pyntrei ïa ka ophis jongka NPP hangne ha Shillong. U la ong kane ka long kaba bakla bad ka bym don nongrim.
Katba na ka liang u Dr. Mukul Sangma, haba kynthoh halor ka jngdawa hiar shuki ka BJP ïa u CM, u la ong ba um kwah ban ong eiei, hynrei un ieh ha ka jingsngewtuh kita kiba don ha ka bor la ki shon ne em ka mynsiem hab kiba kum kine ki jingjia ki wah.
U la ong ba na liang jong u ha u snem 2005, u la hiat shuki kum u Myntri kam pohïing haba la don ka jingdawa na ka liang jong ki paidbah namar ka jingjia ha Garo Hills. “Nga la hiar shuki ha u 2005 kum ka dak ka jingkitkhlieh ban pynkohnguh ïalade ha kat ka jingdawa bad ka jingkwah ki paidbah”, la ong u Dr. Mukul.