Dei ka Congress ba synshar ha Chhattisgarh wat kynnoh ïa ka BJP halor ka jingshah thombor ki Khristan: BJP

Shillong, K’lyngkot 04: U President ka BJP Meghalaya u Bah Ernest Mawrie ha ka sngi Balang u la ong ba ka jingjia shah thombor jong ki Khristan ha Chhattisgarh bad ka jingshah pynjulor jong ka ïingmane Katholik kaba la jia ha ka lah sngi u Blei ka dei kaba la jia ha ka jylla ba la synshar da ka Congress ym ka BJP namarkata, ka Congress kam dei ban thet kti ïa lade bad pynkitpap pat sha ka BJP halor kane ka jingjia.
U Bah Ernest u la ong ruh ba kum ka party ka kwah ban ai khublei ïa u President ka Meghalaya Pradesh Congress Committee (MPCC) u Bah Vincent H Pala uba la kren ïa kane ka mat jingshah thombor ki Khristan ha ka jylla ba ka party kaba u don ka don ha ka bor synshar.
U la ong ruh ba u President ka Congress um dei ban pyrshang ban wanrah ïa ka jingsngew ïapher niam ha ka jylla da kaba kynnoh pat sha ka BJP.
Shuh shuh u la ong ba kane ka jingshem lanot ki Khristan ha Chhattisgarh wat ban phet krad na la ïing bad riehtngen pat ha ki skul bad ki studium ka long kaei kaei kaba da sngewpang met ïa ka party.
“Ki ïingmane ki shah pynjulor bad ïa ki paid riewngeit ki shah pynmynsaw katba ka sorkar Congress pat ka ïohthiah lyngngai khlem lah ai jingïada bad ka long ruh markhongpng ïa kaei kaba u Bah Vincent u kular ba ka Congress kan ai jingïada ïa ki Khristan bad ki riewlum,” u la ong.
Shuh shuh u la kynnoh ïa ka Congress ba ka don da ka rukom synshar kaba pharia shuwa nangta sa bat ïa u lakam synshar kumba la leh da ki Phareng.
U la ong ruh ba lada peit na ki kam pynroi kiba ka sorkar BJP na Delhi ka la mang ïa ka jylla kum ka jingpynpoi um sha man ki thliew ïing, ka jingïarap ïa ki 2.5 lak ngut nongrep ha ka jylla ka pynphalang ba ka BJP kam peit shiliang khmat satia namar wat la na Delhi ki tip ba ka jylla ka dei kaba bun ki nongshong shnong ba dei ki Khristan hynrei ki kam pynroi pat ka theh beit puk puk sha ka jylla.