Shillong Rymphang 02: U Kyrtong ka Voice of the Peoples Party (VPP) na Sohra Constituency u Bah John Wilson Thabah u la ong,” Phi ïohi lada ngi phai sha ka 6th Scheduled ka don ka para 12th A kaba long ka mawjynthud ïa ka bor ka iktiar jong ka district council namar katkum kata ka para 12th (A) kino kino ki aiñ ba la thaw da ka district council lada ki ïa tyngkhuh bad ki aiñ ba thaw ka Sorkar jylla kita ki aiñ kin ïap noh kumta dei halor kane ka daw ba donkam ïa ka bor ka iktiar kaba khlaiñ kaba long lyngba kane ka article 371 namar kane ka aiñ ka ïada ïa ka khyndew ka shyiap, ka ïada ïa ka longtrai ka khyndew ka shyiap bad ka longtrai ïa ki trai ri trai muluk kane ka thaiñ shatei lammihngi bad kane ka jylla Meghalaya bad kumba la sngewthuh shai ba da ka jingdon kane ka article kan ïarap ba kino kino ki aiñ ka Sorkar Pdeng kin ym lah ban thom ïa ki aiñ ba ki ADC ki thaw ban ïada ïa ka hok longtrai ki trai ri trai muluk.
“Ka VPP kam shym don kano kano ka jingthmu ban pynduh pyndam noh ïa ka District Council kumba la kynnoh da mano mano namar kum ka party ka kwah ban pynkhlaiñ ïa ki nongrim ka 6th Scheduled haduh kine ki sngi hynrei ha kajuh ka por pat nalor ka 6th Scheduled ngi kwah ba ka article 371 kan wan khnang ba ngin ïoh ka jingïada kaba khlaiñ ne ka double protection na ka bynta ki trai ri trai muluk jong ngi,” u la ong
Ha kaba ïadei pat bad ka jingkylli ba lada ïoh ïa ka article 371 ka Sorkar Pdeng kan pynduh noh ïa ka 6th Scheduled, u Bah John u la ong, “Nga la ïohi ha kiwei ki jylla kane ka thaiñ shatei lammihngi ba ka article 371 ka treikam ha ryngkat ka jingdonlang bad ka 6th Scheduled bad ngam donkam ban jer kiei kita ki jylla kane ka thaiñ shatei lammihngi kiba donlang ïa ka article 371 bad ka 6th Scheduled naba kumba ka long mynta kine ki jylla ki ïaid lang.”
Ha kawei pat ka liang u kyrtong ka VPP u la kyrpad ïa ki paidbah ka constituency ba kin ym sngew eiei ha kaba ïadei bad ka jingbym lah jong u ban ïakynduh ïa ki paidbah markhmat bad bun kiba kwah ban ithuh, khublei kti, ban ïasyllok hynrei u kyrtong u la ong ba un ïatreilang na ka bynta ka bha ka miat ki nongshong shnong, khamtam ha ka riti dustur ka khyndew ka shyiap bad ka jinglong trai ki trai ri trai muluk.
Ha kawei pat ka liang u Bah John u la ong, “Ha kine ki sngi bad ki por ba la leit noh la ïohi ba ka sorkar jylla ba la ïalam da ka NPP, UDP bad kiwei ki party ki la wanrah ïa ka aiñ sengkam sengjam da ki kompeni kiba nabar jylla ban knieh noh ïa ki jaka puta jong ki paidbah ka jylla Meghalaya khamtam ki thaiñ nongkyndong bad kaba kyrpang kadei ha kane ka thaiñ Sohra naba ki briew ki im na ka kam jingohkai pyrthei, ki tourist ki wan bha bad dei na kane ba ki kompeni ki ïohi bha ïa kane ka spah jong ngi bad kine ki karkhana kin lah ban ong ïa ka Sorkar jylla ban pynïoh jaka lem ïa ki, bad lada ka Sorkar ka ai ïa ki jaka kane ka thaiñ Sohra shano yn leit kum ki paidbah kane ka thaiñ,” ong u Bah John.
U la ong da kaba bynrap, “Ki paidbah kane ka thaiñ jong ngi kin sa kylla long kum ki nongshong ap thap ha la ka jong ka ri, kumta ki paidbah kin hap long kiba husiar bad kumjuh ruh ban ai ka jingkyrshan ïa ka VPP kaba ïeng ha ka hok u paidbah khamtam ha kaba ïadei bad ka khyndew ka shyiap.”
