Dei ban ujor da ka mukotduma bai mynraiñ khmat pyrshah ïa kiba pynthohbria ïa ka jylla: AL Hek

Shillong, Jylliew 09: U Myntri Sorkar jylla u Bah A L Hek ha ka sngi Nyngkong ula ban jur ba dei ban ujor da ka mukotduma bai mynraiñ khmat pyrshah ïa kito kiba pynthohbria ïa ka Meghalaya hadien ka jinglap ki Pulit ïa ki jingshisha ïa ka jingshah pynïap u nong Indore ba wan honeymoon ha Sohra bad jingleit pyndem ka kurim jong u hakhmat ki Pulit na Uttar Pradesh ha ka janmied jong ka sngi U Blei.
U la ong, “Ka ïing ka sem jong kine ki shikurim ki la kynnoh ïa ka Sorkar Meghalaya bad ki Pulit bad khamtam ka long kaba pynjah burom ba ki la kynnoh ïa ki nongshong shnong ka Meghalaya.”
Haba ïakren bad ki lad pathai khubor u Bah Hek u la ong, “Nga la deo ong ha ki sngi ba la leit noh ba ngi dei ban ujor da ka mukotduma bai mynraiñ khmat pyrshah ïa kine ki briew kiba pynthohbria pynbudnam ïa ka jylla Meghalaya bad ïa ki nongshong shnong ka Meghalaya. Ngi hap ban mudui da ka mukotduma bai mynraiñ khmat.”
U Myntri ka sorkar jylla haba ai khublei ïa ki Pulit ka Meghalaya, u la ong, “Ki la leh ïa ka kam kaba itynnad bha. Tang hapoh 7 sngi ki la ïoh ban kem ïa ki runar bad hapoh 7 sngi ki la pyni ïa ka jingtbit jong ki ban trei ïa ka kam. Bravo ïa ki Pulit ka Meghalaya. Kila leh ïa kaba bha tam ban kem ïa ki briew kiba donkti.”