Dei ban shim jingkitkhlieh ka sorkar jylla ba thut ka shongsuk shong shngaiñ ha ka jylla: MPCC

Shillong, Nailar 22: Ka Meghalaya Pradesh Congress Committee (MPCC) ka la pynrem jur ïa baroh ki jingjia ïaumsnam, ki jingpynthut kiba long ka daw jong ki jingtieng bad kiba wanrah ki jingjynjar ïa ki paidbah jong ka Shillong bad Meghalaya.
Ha kajuh ka por ka MPCC ka shim ba ka sorkar kaba la ïalam da ka NPP-BJP ha ka jylla ka dei ban shim ka jingkitkhlieh halor ki jingpulom ban tehlakam ïa ka jinglong jingman, ban ïada ïa ki nongshong shnong bad ban pynneh ïa ka suk ka saiñ bad ban khanglad ïa ki jingkiew ki jingjia ïakajia kynthup ruh ha shilynter u pud u sam ka Meghalaya-Assam.
Ki paidbah ka Meghalaya ki la kylla long langknia ha ki bor pynïaid kiba ym lah ban pyndon ka jingïadei bad ki paidbah bad kiba pynbun tang ka ktien ban shakri ha ki kam synshar khaddar. Wat ba ki don ki lad syntiat, ki bor ban ïada bad ki jingmaham kiba biang halor ki jinglah ban jia eiei, ka sorkar ka la pulom ban leh eiei, ka jingpynkhreh jong ka jinglong jingman kaba la dawa.
Kine ki jingjia mynta la hap ban kit da ki nongshong shnong. Ki briew kiba leit jingleit na Meghalaya ki sngew ba kim don ki lad jingïada. Ki Tourist ki la hap ban pyndam noh ïa ki booking, kaba la wanrah ki jingduhnong ïa ki hotel, homestay, taxi operator, ki restaurant, ki dukan bad ki hajar tylli ki longïing kiba shaniah ha ka kam jngohkai. Kiba pang bad ki hospital ki la mad ki jingeh na ka daw ka leit ka wan bad ka jingpynpoi biang por ki dawai bad kiwei ki tiar kiba kongsan kiba la shah ktah. Ki samla pule, ki nongtrei, ki nongkhaïi bad kiba leit ba wan ki la mad na ki jingeh ba ki khlem da la dei ki daw jong ki.
Ka Congress ka la ong ba ka Meghalaya kam lah ban shah ïa ka dur ka dar jong ka jingbym shngaiñ bad ka jingbym skhem. Kan shim por da ki snem ban tei biang ka jingshaniah hapdeng ki tourist, ki nongpynlut pisa bad kiba wan jngoh, hynrei tang ki jingjia kiba tang shipor bad ki jingbym lah ban khanglad na ka sorkar ka la pynjulor ïa kane ka jingshaniah.
Ka MPCC ka pynpaw ka jingsngewkhia halor ka jingpynbeit ïa ki jinglong jingman ha pud u sam ka Meghalaya-Assam. Ka jinglong jingman hapdeng kine ki arjylla ka donkam ïa ka jingïalam kaba la rangbah, ka jingbteng ki jingïakren bad ki jingtuklar ba biang por. Ym dei ban shah ba kin heh khlem da dei tang na ka daw ka jingbym suitñiew ki bor pynïaid bad kiwei kiwei.
Ka congress ka kynnoh ba kane ka sorkar ka pyrkhang ban tap ïa ki jingpulom jong ka da ki jingpynbna, ki jingpynthikna bad ki lad pynbna paidbah. Ki jingshah kynnoh bamsap, ka jingduna ha ki jingkheiñ jingdiah bad ki jingmlien ban shu kular khlem da pyntreikam eiei ka la pyntlot ka jingshaniah na ki paidbah ha ki bor sorkar.
Ka la ong ban pynneh ïa ka shongsuk shongsaiñ ka dei ka jingkitkhlieh jong ka sorkar. Ka sorkar kam lah tang ban shu pynrem ïa kaei kaba la jia, hynrei ban leh eiei ban ïada.