Nongpoh, Nailar 29 : Ka HYC, Ri Bhoi District myta ka sngi ka la dawa na ka sorkar jylla ba ka dei ban sangeh shuwa shipor ban wan rah ïa ki sniang kiba na shabar ka jylla bad ka daw kaba la pynlong ïa ka sneg ban dawa sangeh ban wan rah ïa ki Sniang na shabar ka dei halor ka jingma na kata ka jingpang ba la tip kum ka African Swine Fever (ASF).
Ka seng ka la shim khia ban dawa halor kane ka bynta ban sangeh ka jingwan rah sniang na shabar, ka dei halor ka nongrim ba ki nongri sniang na ka District ki la ujor sha ka seng bad pynpaw ka jingsngewkhia halor ka jingtuid kine ki sniang kiba na shabar kaba ktah pat ïa ki sniang jong ki trai jylla lyngba katei ka African Swine Fever.
Kumba la ioh lum jingtip ruh halor kane ka bynta, kiba bun ki nongri sniang ki la pynpaw ka jingsngewkhia kaba jur ba ha kine ki sngi la don ka jingïap ki sniang ba ki ri bad ki la suba ba kane ka lah ban dei na katei ka jingpang sniang ba la tip kum ka African Swine Fever.
U Bah Hercules Suting, General Secretary haba kren sha ki nongthoh Khubor, u ong ba ka seng ka sngewkhia halor kane ka jingujor ki nongri sniang na ka District bad kum ka seng ka kwah ba ka sorkar kan pyrkhat kyrpang ïa ki nongri sniang na ka jylla da kaba kan sangeh shwa shipor ban wan rah ïa kine ki sniang kiba na shabar, kaba long ka jingduhnong na ka bynta ki nongri sniang ka jylla lada ki sniang ba ki ri ki shah ktah na katei ka khlam jingpang jong ki sniang ba la tip kum ka African Swine Fever.
U la ong ruh kumba la ioh lum jingtip da ka seng, kitei ki sniang kiba wan tuid sha kane ka jylla ki dei kiba wan na ka jylla Punjab bad ha katei ka jylla ki bun ki sniang kiba shah ktah eh na ka joignpang ASF.
U la bynrap ruh ba kitei ki sniang kiba wan rah na jylla Punjab, ki dei kiba ïaid lyngba ka jylla Assam ha kaba ha kane ka jylla ruh ki don shibun ki sniang kiba shah ktah na katei ka jingpang African Swine Fever bad kum ka seng ka kwah ba ka sorkar ka hap ban tehlakam bha na kane ka jigpang namar shisien ba la shah ktah ki sniang hapoh ka jylla ka jingduhnong ka dei na ka bynta ki nongri sniang jong ka jylla.
Shuh shuh, u la bynrap ruh kum ka seng ka kyrpad jur ïa ka sorkar ba ka hap bansangeh shuwa shipor ban wan rah ïa kitei ki sniang kiba na shabar ka jylla, ha kaba ka seng ka kren ïa kane ka phang ka long ba kam kwah ba ki nongri sniang na ka jylla kin shah ktah jur halor ka kam ri sniang lada ki sniang ba ki ri kin shah ktha ha katei ka jingpang sniang ba bun ki sniang ki la shui ap bad kaba long ruh ka jingduh nong ïa ki nongri sniang ka jylla, u la bynrap.
