Dei ban pyrshang ban ïadie ïathied tang ki sniang ba ri hi hapoh ka jylla: Banteidor

Shillong, Naitung 02 : U MLA ka Mawkynrew Constituency, Bah Banteidor Lyngdoh ha ka sngi Palei u la ong ba ka jingwan syllad ka khlam sniang ha ka jylla ka la dei ïa ka sorkar khang noh shipor ïa ka jingwanrah ïa ki sniang na shabar bad ban pyrshang noh da ka jingïadie ïa thied tang da ki sniang kiba ri hi hapoh ka jylla.
Ïa kane u Bah Banteidor u la pynpaw hadien ba ka kynhun ki nongri sniang ha ka jylla ki la wan ban kynduh ïa u Myntri ka tnad Animal Husbandry & Veterinary Department, Bah Sanbor Shullai ban pynsngew halor ki jingeh kiba bun ba ki nongrep bad ki nongri jingri ha ka jylla ki ïa kynduh naduh ba wan ka khlam sniang.
Haba kren sha ki lad pathai khubor, u Bah Banteidor u la ïathuh ba ha katei ka jingïalang kaba la donlang ruh da ki ophisar ka tnad, la ïakren sani bha halor ka jingjur ka jingïap ki sniang namar ka jingpur ka khlam, kaba la ktah jur ïa ka kam ri sniang bad ka dor sniang ha ka jylla.
U la ong ba u Myntri u la ai ka jingkular ba hapoh artaïew un sa rah ïa kane ka mat sha ka jingïakren bad u Myntri Rangbah ka Jylla, namar ka dei ka kam kaba khia kaba donkam ïa ka rai jong ka Sorkar jylla.
“Kaba sngewtynnad ka long ba na ka liang u Myntri ruh u la pynpaw ba un ai jingmut sha ka Sorkar ban pynsangeh shwa shipor ïa ka jingwan rung ki sniang na jylla shabar bad ban pynmih ïa ka notification kaba donkam, khnang ban tehlakam ïa ka jingpur ka khlam bad ban ïada ïa ki sniang ba ri hapoh Meghalaya,” ong u Bah Banteidor.
U Bah Banteidor u la ïathuh ba ki nongri jingri ruh ki la pynpaw ïa kajuh ka jingsngew, da kaba kynnoh ba ka jingwan rung ki sniang na shabar ka jylla ka dei kawei na ki dawbah kiba pynsaphriang ïa ka khlam. Kumta, u la ban jur ba dei ban khang noh shwa ïa ka jingwan rung ki sniang na shabar, hynrei ban ailad tang ïa ki sniang ba ri hapoh ka jylla.
“Kumta, kumba la kren ha ka jingkynduh kaba nyngkong kumjuh mynta ka kynti ruh, ngi kyrpad ban pynsangeh shwa bad ban ym pat shah ïa ka jingwanrah ïa ki sniang na shabar. Na ka liang u Myntri u la ai ka jingkular ba kin sa pynmih ïa ka notification ban khang shwa shipor la kumno kumno lai bnai saw bnai bad ngin peit kein ka long kumno hadien kata,” la bynrap biang u Bah Banteidor.
Shuh shuh, u Bah Banteidor u la ong ba kum u nongmihkhmat u sngew dei ban ailad shwa ïa mynta ban ïadie ïathied tang hapdeng ki nongshong shnong ka jylla (local for local) da kaba kyntu ïa ki paidbah ban thied ïa ki sniang ba la ri hapoh Meghalaya, namar kane kan ai jingmyntoi ïa ki nongri jingri bad kan kyntiew ruh ïa ka ïoh ka kot ha ka jylla.
“Lada ngi pyrshang kan bha bad kan long ka jingmyntoi hapdeng para mangi hi ki nongdie bad ki nongthied ha kaba ki nongdie kin ïoh nong bad ki nongkhaii ruh kin ïoh la ka jong ka bynta kaba ki dei ban ïoh,” u la ong.
Katkum ka jingong jong u, ka jinghiar ka dor die sniang ka la ktah jur ïa ki nongri jingri. U ong ruh ba shwa kane ki lah ban die ïa uwei u sniang ha ka dor 17,000 haduh 18,000, hynrei mynta ka dor ka la hiar sha ka 10,000 haduh 11,000, kaba la wanrah ka jingduhnong kaba khraw ïa kiba im da kane ka kam.
Na ka liang jong u, u la pynpaw biang ba ka jingïakren bad u Myntri kam kut hangne, hynrei ka Sorkar kan dang bteng ban bishar bad buddien ïa kane ka mat khnang ban wad ïa ki lad ki lynti kiba paka ban jingïada ïa ka jingim bad ka jingïoh jingïarap jong ki nongrep bad ki nongri jingri ha Meghalaya.
Ha kajuh ka por u la ong ba ki la dep ruh ban kyrpad ïa u Myntri haba ïadei bad ka jingud ki nongri sniang kiba shim da ka ram kaba hapoh 10 lak ban pynjur ïa ka kam ri sniang bam doh ha ka jylla. Katkum ka jingong jong u, kine ki nongri jingri kim lah shuh ban siew ïa ka ram ba ki shim hadien ba ki sniang ba ki ri ki la ïap lut na ka jingwan syllad ka khlam.