Dei ban pyntreikam da ka Notification 1951 halor u pud u sam ka Assam bad Meghalaya: KSA

Shillong, Naitung 20: Ka Karbi Students Association (KSA) ka la aiti ïa ka dorkhas sha u Lat ka jylla Assam u Lakshman Prasad Acharya ha ka jingwan jngoh jong u sha Karbi Anglong ba dangshen, ha kaba ki la wanrah ïa kiba bun ki mat kiba ïadei bad ki hok jong ki trai ri trai muluk, ka jingïoh trei laitluid ka thaiñ bad ki kam jingtei bapher bapher.
Ki jingdawa ki kynthup ïa ka jingshim rai jong ka jylla Assam bad Meghalaya halor ka kam jingïakajia pud ha ka thaiñ Karbi Anglong, ka jingpyntreikam ïa ka Article 244 (A) ka Constitution for autonomous statehood, bad ki jingsngewkhia ïa ki jingthmu ka kynhun myntri ka sorkar Assam ban ai ka kyrdan kaba kyrpang ïa ki kynhun jaitbynriew Moran bad Motok.
Haba kren sha ki lad pathai khubor u President ka KSA u Bhudho Terang u la ong ba ka seng ka la kyntu ïa u Lat ban pynthikna ba ka 1951 Government Notification ha ryngkat bad ïa ki jingdon ki pud ki sam ba mynta, ba dei ban pyndonkam kum ka legal framework ban kdew bad buh dak ïa u pud u sam jong kine ki artylli ki jylla.
U Terang u la ong ba ki jaka ba la buh jingkylli ki dei kiba hab hapoh u pud u sam jong ka Karbi Anglong Autonomous Council bad ba kam shym la don satia ka jingkyntur pud na ka liang ka West Karbi Anglong.
U la dawa ruh kumjuh ba baroh ki mawpud ba la shah pynjulor dei ban pynïeng bad sieh biang mardor. Ka KSA ka la pyntip ruh sha u Lat ka jylla halor ka jingjia ba shah pynjulor ki jingthung jingtep ha ka thaiñ Tapat jong ka West Karbi Anglong kaba la kynnoh ba la ïalam da ka Khasi Students Union na Meghalaya.
Kane ka seng ka la pynrem ruh ïa kane ka jingleh bad ka la kyntu ïa ka sorkar jylla ban shim da ka kam kaba tyngeh ban ïada ïa ka jinglong laitluid ka jingsynshar hi halor u pud u sam ha kane ka thaiñ.
Halor ka mat ka autonomous statehood hapoh ka Article 244 (A), u Terang u la ïathuh ba u Lat u la ithuh ïa kane ka jingdawa kaba la slem hynrei u la pynshai pat ba kan ym lah ban long kaba biang ban ïakren ïa kane ka kam mynta.
Hynrei u Lat ka jylla u la pynthikna ba ïa kane ka kam yn bishar shwa. Ka KSA ka la wanrah ruh ki jingsngewkhia halor ka rai ba dangshen ka sorkar Assam ban ai ka kyrdan kaba kyrpang ïa ka Moran bad Motok, da kaba ong ba ïa kane dei ban shim jingkheiñ bha haba ïadei bad ki hok longtrai ki trai ri trai muluk ha kine ki hill district.
Ka KSA ka la pynpaw ruh halor ka jinglong ki surokbah ba ïaid saw tylli ki kali, kaba la sniew kaba ïaid lyngba ka Karbi Anglong bad ka la kyntu ïa u Lat ka jylla ban bthah ïa ka jingmaramot kaba mardor bad ka jingpynbha noh ïa ka.
Kine ki mat ba la aiti da ka KSA ki thmu ban ai ka jingïada kaba kyrpang ïa ka riti synshar, bad ki lad jingtei na ka bynta ka bha ka miat jong ki briew ka autonomous hill region.