Dei ban pynsangeh lut ïa baroh ki tamasa ha baroh kawei ka District

Nongstoiñ, Naiwieng 22: Kum ka dak jong ka jingsngewsih kthang ïa ka jingshah siat ïap ki paradoh parasnam ha Mukroh West Jaiñtia Hills, ha kaba san ngut ki riew lui lui ki la shah siat ïap bad bun ngut ki paidbah ki la mynsaw ha ki ktang suloi ki pulit Assam, kaba la jia ha ka step 22 tarik mynta u bnai, ki saw tylli ki sengbhalang kiba kynthup ïa ka WKSU, MYF, WYF bad ka UHM West Khasi Hills, ki pynrem jur ïa ka jingleh palat ki pulit Assam.
“Ngi lah ban ong ba ki pulit Assam khawpud bym don shuh ka jingsngew briew bad ki nud ban shim jingim ïa ki riew paidbah ba lui lui kiba khlem tiar khlem tar ha ka met jong ki, ka dei ka kam riew khlaw riew thrang snam. Ki saw seng bhalang ki pynrem ïa ka Home Department ka sorkar MDA, khamtam ïa ki pulit Meghalaya kiba pahara ha ki khappud ha kaba ki khlem lah ban ai jingïada ïa ki briew la jong kiba shong ha ki thaiñ khappud”, ong ka kyrwoh na u samla D.Sun President ka seng WKSU.
“Ïa kine ki pulit ka jylla Meghalaya ruh ngin kheiñ kum ki khaw pud bad ba ïa syriem la kum ki khnai ba shu phet rieh ha ki thliew ki sar. Ki saw seng ki pynrem ïa ki heh pulit kum ki DGP, nangta naduh u CM Conrad Sangma Deputy CM P.Tynsong bad Lakmen Rymbui ba peit ïa ka Home Department bad kynthup ïa baroh ki Minister ki MLA ka sorkar MDA, ki bym shim la lah ban wanrah ïa ka shongsuk shong shngaiñ ha ka jylla khamtam ha ki thaiñ khappud. Ki saw seng ka kynthoh ïa ka sorkar MDA ba lada kam lah shuh ban synshar, kan khambha ban ïa hiar shuki lut noh. Katno ka jingsngew leh rain, la shuh phlei snam ïa ki trai ri trai muluk man ka por, tang na ka daw u lakam jong ki khlem u bud lum”, u la ong biang.
“Ki saw seng ki dawa na ka sorkar lyngba ki bor District bad kum ka dak ka jingsngewsih ktang ïa baroh ki lui lui kiba la shah siat ïap, ba ki dei ban pynsangeh shwa ïa baroh ki program kum ki Festival bad kiwei kiwei ki ïarong tamasa. Kane kan long kum ka dak ka jingsngewsih ïa ki jingduh ei noh ki mynsiem ba kordor ha Mukroh West Jaiñtia Hills. Ki saw seng ki phah ka kyrwoh sngew lem sha kiba haïing hasem kiba la duh noh ïa la ki baieit ba thoiñ bad ai ka snam jong ki lui lui kan kyrsiew thiah ïa ki pateng ki ban wan”.
“Ki saw seng ki ai khublei ïa u DC Nongstoiñ, u ba la ïatreilang bad ka kynhun ban pynsangeh shuwa shipor ïa baroh ki jait tamasa wat lada ngi kum ka kynhun ngi la shu ïa kren lyngba ka phone namar ki kam bym lah kiar”, ong u samla D.Sun.