Dei ban pynïasoh ïa u Aadhaar bad EPIC ban lap ïa kiba don vote artylli, pynpaw u MDC ka Tura

Shillong, Jymmang 04: U MDC ka BJP na Tura u Barnard N Marak u la ai jingmut ïa ka jingdonkam ban pynshisha bad ka jingdonkam ban pynïasoh ïa u Aadhaar bad ka EPIC khnang ban lap bad ban pynduh ïa ka jingdon ki card thep vote ba artylli ne ka jingpyndonkam bakla ïa ki voter registration, khamtam ha ki distrik kiba don ha khappud jong ka jylla.
Ha ka jingthoh ba la phah ha ka sngi U Blei u Marak u la ong ba ka long kaba kongsan ban pyntreikam ïa kane ka jingpynïasoh ïa u Aadhaar bad ka EPIC da ka sorkar Meghalaya bad ka GHADC ban pynshisha bad ban bishar ïa ki kam ai jaka sha ki briew kiba ïa ka jinglong nongshong shnong ki bym lah ban pynthikna.
U la ong ruh ba donkam ban pynkhlaiñ ïa ka jingpeitngor bad ka jingïatreilang hapdeng ka jylla bad ka sorkar pdeng ban peitngor ïa ki jaka ha khappud bad ban ïada na ka jingwan rung beaiñ jong ki briew kiba nabar ri nalor ka jingdonkam ban ïada ïa ka hok jong ki riewlum, nangta ka jingkyrduh kam kyrduh jam, ka jingbat ïa ki jaka puta bad ban pynthikna ba kam dei ban don ka jingïapeiñ ha kaba ïadei bad kane ka bynta.
Na ka liang jong u Marak u la ong ba ha kine ki phew snem ba la leit kane ka thaiñ shatei lammihngi, khamtam ka thaiñ Garo Hills, ka la sakhi ïa ka jingkylla jong ki jaka kiba donkam ban shim khia bha. Ki la don ruh ki jingsngewkhia halor ka jingwan rung kyrthep jong ki mynder ri na East Pakistan kaba mynta ka dei ka ri Bangladesh, ha kaba bun na ki, ki sah ha ki jaka ri thor bad kumjuh ruh sha ki thaiñ ri lum. Kane ka jingwan rung beain kaba la long barabor kaba beain ka la kyntiew ïa ka jingbun paid ha ka ri, bad kaba la ktah ruh bha ïa ka imlang sahlang jong kane ka thaiñ.
U la bynrap ruh da kaba ong ba ka jingduna bad ka jingbym shim khia jong ki riew saiñ pyrthei bad ki bor pynïaid sorkar khamtam hapoh ka jingsynshar jong ka seng Congress mynshwa, ba la kynnoh ba ka la pynsuk ïa ka jingwan sah jong kine ki briew kiba wan poi wir na bar ri.
Na kine, ki la mih ki jingeh ïa ki nongshong shnong khamtam ha Garo Hills, kiba la mad ïa ka jingshah kyntur pud sha ki jaka jong ki ba la buh da ki mynba rim, ka jingkylla ha ki kam kolshor, bad kiwei ki jingeh kiba kynthup ha ka kam shongkha bad ki kam bat khyndew.
“Ha ka ri synshar paidbah ka long kaba kongsan ïa ki nongshong shnong trai ri trai muluk ba kim dei ban shah tyllep na ka daw jong ka jingdon ki briew kiba nabar ki bym biang ki kot ki sla. Ngi donkam ban ïada ïa ki hok jong ki trai ri trai muluk da kaba pynthikna ba ki electoral roll bad ki land record ki dei ban long kiba shai bad ban lait na ka jingwan rung beaiñ ki briew kiba namar ri,” ong u Marak.
“Nga khot ïa baroh ki nongshong shnong kiba dei ki riewlum bad ki bar jylla kumjuh ba kin ïatylli ban ïada ïa ki hok kiba la buh hapoh ka riti synshar jong ka ri kiba la ai sha kane ka thaiñ. Kane kam dei ka kam jong ka niam ne ka jingithuh, hynrei ka jinglong nongshong shnong kaba dei da ka aiñ, nangta ka jingdonkam ban ïoh ka jingshngaiñ bad ka lawei jong ki nongshong shnong bad kumta nga kyrpad ïa baroh ki nongshong shnong ban ïakhun ïa kine ki jingma kiba ktah ïa ki hok jong ngi bad ka jingïalong kawei jong ka jylla,” u la bynrap.