Dei ban pyndep ia ka jingpynpoi umdih shaman ki kyrpong iing hapoh u Lber 2024 : Tudu

Shillong, Nailar, 12: U Myntri Khynnah ka Sorkar Pdeng uba khmih ïa ka tnat Jal Shakti bad Tribal Affairs, u Bishweswar Tudu ha ka sngi Thohdieng u la kyntu ïa ka Sorkar Jylla ba ka dei ban pyndep noh ïa ka jingpynpoi umdih sha manla ki thliew iing hapoh u Lber, 2024.
U Tudu u la wan iuhkjat ha Meghalaya na ka bynta ban peit pyrman ïa ka jingpyntreikam pura ïa ki skhim ba la bei da ka Sorkar Pdeng da kaba u la lum ïa ka jingïalang ïa ki heh Ophisar ka Jylla Meghlaaya ha State Convention Centre, Shillong.
U Myntri Khynnah u la pan jingtip ruh ha kaba ïadei bad ka jingpyntreikam ïa ka skhim Jal Jeevan Mission (JJM), ka Swachh Bharat Mission (SBM), ka Pradhan Mantri Krishi Sinchayee Yojana (PMKSY) bad kiwei kiwei ki prokram hapoh kine ar tylli ki tnat Sorkar.
Ha ka jingïakren bad ki lad pathai khubor hadien ba la peit ïa ki jinglong jingman jong ki prokram kiba dang ïaid shakhmat hapoh ka tnat jong u, u Tudu u la ong ba ki Ophisar ka tnat ki la pyni ïa ki bynta ba bniah shaphang ka jingpyntreikam bad ki jingjop hapoh ki skhim bapher bapher kum ka Jal Jeevan Mission (JJM), ka Swachh Bharat Mission (SBM) bad ka Pradhan Mantri Krishi Sinchayee Yojana (PMKSY).
U la ong ba khnang ban sngewthuh kham bha ïa ka jingpynïaid ïa kine ki prokram, un sa leit jngoh ïa kine ki jaka pyntreikam lashai mynstep.
Haba kren shaphang ka JJM, u Tudu u la ong ba ka thong ban pyndep ïa ka jingpynpoi umdih sha manla ki thliew iing kaba shi spah na ka shi spah ka dei ban long shwa u Lber 2024.
“Ka jinglong ha ka ri baroh kawei ka long kumba 50% hynrei ka thong ka dei ban poi sha ka 100% shuwa u Lber 2024,” u la ong da kaba bynrap ba dang dei ban shim ïa ki sienjam ban kot sha kane ka thong.
U Myntri u la kyntu ïa ki Sorkar jylla ba kin ïatrei lang bad ka Sorkar Pdeng ban kot sha kane ka thong.
U Myntri u la pdiang ruh namarba ka jylla Meghalaya ka dei kaba bun ki lum, ki don ki jingeh kiba wan bad kane. U la ong ba ki la don ki jingpynslem ban pyntreikam ïa katto katne ki projek namar kine ki jingeh.
U la ong ba ka Sorkar Pdeng ka sngewthuh ïa ki jingeh bad ki jingkhuslai jong ki jylla bad ba ka pdiang ïa ki sienjam ban pynbeit ïa kine.
“Nga la ai jingmut ïa ki ba kin bud ïa ki kyndon pyntreikam bad lada lah, ngin pynsuk ïa katto katne ki kyndon khnang ban lah ban pyntreikam ha ka por kaba biang,” u la ong.
Haba jubab ïa ka jingkylli shaphang ka jingmang pisa sha ka jylla, u Myntri u la ong, “ka tnat DoNER ka la phaikhmat kyrpang sha ki jylla ka thain shatei lammihngi, kumta katkum ka jingïaid shaphrang ki kam, ka DoNER kan nang ai shuh shuh ki jingïarap pisa.”
Kane ka dei ka sien kaba nyngkong ba une u Myntri ka Sorkar Pdeng u la wan iuhkjat ha Meghalaya ban peit pyrman ïa ka jingpyntrei ïa ki projek ba pyntreikam ha ka jylla.