Shillong, Naiwieng 22 : Kum ka dak ban pynpaw ka jingpyrshah jur ïa ka jingbym burom ka Assam ïa ka soskular ba la ïasoi na ka bynta ban ïa pynbeit ïa u pud u sam namar kane ka jingjia ba la jia mynta ka sngi ha Mukroh kaba la wanrah ka jingiap haduh san ngut ki mynsiem briew bad uwei u forest guard ka Assam hi ka long kum ka sakhi kumta ka sorkar Meghalaya ka la dei ban pyndam noh ïa baroh lai tylli ki Regional Committee ba la thung ban ïakren pynbeit pud bad kumjuh ruh ban pynsangeh noh ïa ka MOU ba la dep ïasoi hakhmat u myntri kam pohïing ka sorkar pdeng da u Myntri Rangbah ka Meghalaya u Conrad K Sangma bad u Myntri Rangbah ka Assam u Himata Biswa Sarma ong u MLA ka Mawlai Constituency u bah Process T Sawkmie.
U bah Process u la dawa ruh ba dei ban thung da ka jingtohkit ba laitluid halor kane ka jingjia khnang ban lap ïaki jingshisha baroh kumno ka sdang ba la poi haduh une u pud ban siat iap pathar ïa ki mynsiem briew. “ Kum u nongmihkhmat paidbah jong ka jylla Meghalaya nga sngewdei ban pynpaw ka jingsngew sih kaba khraw bad sngew pyrshah jur halor kane ka jingjia bad nga dawa ba dei ban thung da ka jingtohkit ba laitluid. Nga dawa ruh ba ka sorkar Meghalaya bad sorkar Assam ki dei ban thaw ki lad ki lynti ban wanrah biang ïa ka jingshongsuk shongsaiñ ha ka thaiñ khappud hi baroh kawei namar kane ka jingjia ka la pynher syrngiew lut ïa baroh” ong u bah Sawkmie.
U la ong kane ka jingjia ka la pynkthang da shisha ïa ki paid nongshong shnong ka jylla namar la shu siat pathar ïa ki briew la kum ki mrad kat haduh ba hynriew ngut ki mynsiem briew ki la iap ei da kane ka jingleh ki pulit Assam. U la dawa ba dei ban pynsangeh lut ïa baroh ki tamasa ba la pynkhreh ban pynlong ha ka jylla kum ka dak ka jingsngewsih halor ka jingjia bad dawa ruh ba ka sorkar Meghalaya bad Assam ki dei ban ai jingïarap da ka pisa sha ki long ïing jong kito baroh kiba la duh ei ïa ka jingim bad kumjuh ruh sha kito kiba mynsaw. Nalor ka jingïarap dei ban pynlut pynsep ïa ka bai dawai bad bai sumar na ka bynta jong ki da ki ar sorkar.
