Shillong, Nailar 30: U Chief Executive Member jong ka Khasi Hills Autonomous District Council u Bah Titos Starwell Chyne ha ka sngi Ba-ar u la ban jur ba ka sorkar jylla ka dei ban syllok shuwa bad ki Autonomous District Council hashuwa ban jam sha khamat ba ka jingpynbeit ïa u pud u sam. U Bah Titos u la ong ruh ba ka jingduh ei ka jaka ha ki jaka khappud ka jylla Meghalaya bad Assam ka dei namar ki don ki nongïalam shnong kiba die tuh ïa ka jaka sha ki bym dei ki Khasi bad wat sha ki nongshong shnong jong ka jylla Assam ruh. Shuh shuh u la ong ba na ka liang ka council kam pyrshah satia ïa ka jingpynbeit ïa u pud u sam hynrei ka jingpynbeit kam dei satia ban shu leh kyrkieh hynrei ban da ïaid bniah bin pa bin ba kan long ka jingmyntoi ïa ka jylla hi baroh kawei.
