Ym lah khlem da ai jingïaroh ïa ka tnat Pulit Ribhoi kaba la pyndep hok ïa la ka jong ka kamram ba ka Sorkar ka la bynshet ban pyrkhing bad ban tehlakam ïa ki kam runar ruser kiba la pynshong syier ïa ka imlang ka sahlang.
Ym lah ban len ba kane ka jingtrei borbah jong ki Pulit ka Ribhoi hapoh ka jingïalam jong u Senior Superintendent of Police ka la lah ban khanglad khamtam eh ïa ki riewsniew kiba ju mlien ban leh ïa ki kam pyntriem da kaba shim kabu ïa ka jingdum jong ka miet. Ka jingpeitngor jong ki Pulit ka Ribhoi ha shilynter ka surokbah National Highway-6 ka la pynduna ïa ki jingjia ba sngewsih khamtam ki jingjia aksiden kiba ju jia khah khah na ka por sha ka por bad tang hapoh ki khyndiat bnai palat 20 ngut ki mynsiem briew kiba la duhei ïa la ka jong jingim na ki jingjia aksiden ha surokbah NH-6 ha Ribhoi District.
Dei lyngba ka jingtalasi kali jong ki Pulit ha ka por mynmiet ha ka surokbah kaba la pynduna ïa ki nongñiah kali kiba pynkheiñ ïa ka ain jong ka Motor Vehicle Act kaba mana ban dih kiad ha por ba ñiah kali khnang ban ïada ïa ka jingim ym tang ïa ki ñongniah kali hynrei wat ïa kiba shong lang hapoh ka kali.
Nalor kata, ngi la sakhi ïa ki jingjia ba laiphew jait ha shilynter ka surokbah National Highway-6 ha them Ribhoi ha kaba ki Pulit ha ka jingtalasi kali ki ju ïohkem ïa ki nongkhaii drok, ki nongtuh kali, ki nongtuh thuk thuk bad wat ïa ki mynder na ka ri Bangladesh kiba pyndonkam ïa kane ka surok ban ngam sha ki bynta bapher bapher jong ka jylla bad ban rung tuh sha kiwei ki bynta jong ka ri India namarba ka Jylla Meghalaya kaba don markhap bad ka khappud jong ka ri Bangladesh ka dei ruh ka khyrdop kaba pynïasoh ïa ki jylla ha ka thaiñ Shatei Lammihngi.
Da ka pynap ktem bad ka jingtalasi jong ki Pulit ïa ki kali kiba ïaid baroh 24 kynta na surokbah National Highway-6 bun ngut ki snar nongkhaii drok kiba na kane ka jylla bad kiba wan na ka jylla Manipur bad na kiwei kiwei ki Jylla ki la ngat ha ka shrip jong ki Pulit namarba ka Sorkar Meghalaya ka la trei borbah ban ïakhun thma pyrshah ïa ka jingwanrung jong u drok na ka ri Myanmer sha ka jylla Manipur bad sha kiwei kiwei ki bynta jong ki jylla ka thaiñ Shatei Lammihngi.
Dang shen ka Sorkar ka la pynjulor ïa u drok ha ka pajwa barhem jong ka Star Cement bad ïa kiwei kiwei ki jingdih kiba la ñiew beaiñ ïa kiba ki Pulit ki la ïoh kurup. Ngi la sakhi ruh lyngba ka jingtrei borbah jong ki tnat treikam bapher bapher bad ki dorbar shnong ka jingdon jong ki nongdih drok ka la nang hiar bad bun na ki samla kiba la ngop ha u drok ki la don hapdeng ki jingshah sumar namarba ka Sorkar ka la kut jingmut ban pynlong ïa ka jylla Meghalaya kaba laitluid na u drok.
La sakhi ruh ba wat ha ki bynta bapher bapher jong ki District ka jylla ki Pulit ki la pynjur ïa ki jingtalasi kali khamtam ha ka por mynsiem namarba ka jingjyllei shaba palat ki nongñiah kali kiba buaid ha ka por mynmiet ki bym salia wat ban pynwit ïa ka leit ka wan ha surok tang namarba ki la shongshit khawyiang.
Hynrei wat hapdeng ka jingtrei borbah ba khlem shongthait jong ka tnat Pulit, hynrei ki nongpynkheiñ aiñ kim peitmat bad kim salia hi ruh wat ïa ki bor jong ka aiñ namarba la don ba ïada ïa ki da ki briew kiba don ha ka bor. Kumba la sakhi, ka leit ka wan ha surok khamtam ha nongbah Shillong ha ka por mynmiet kam long satia kaba shngaiñ namarba ka jingjyllei shaba palat ki nongñiah kali kiba buaid khawyiang kiba pynher ïa ki kali kum ki khnam. Kaba kham isaitmet bha ka dei ha ka thaiñ Khyndai Lad ha kaba ki Pulit bad ki CRPF kiba ju pahara ki long tang ki nongpeit kai ïa ka jinglong isaitmet jong ki briew kiba ïabam ïadih bad kiba leh ïa ki kam ba laiphew jait.
Ban pynlong ïa ka shnong ka thaw kaba shongsuk shongsaiñ ka Sorkar ka la dei pynmih ïa ki jingpyrkhing khnang ba ki briew kin kham long adkar ha ka leit ka wan bad ha ka ïaid ka ieng bad ba ka jingleh sngewbha jong kiwei, kan ym long pat ka jingpynsngewsih ïa kiwei pat.
