Shillong, Rymphang 22: U MLA ka Congress na Umsning, u Dr. C. Lyngdoh ha ka sngi Palei, u la dawa ban thung da ka jingtohkit ha kaba ïadei bad ka jingpyntreikam ïa ka skhim Jal Jeevan Mission(JJM) ne ka skhim ai um sha ki ïing briew ha nongkyndong.
Haba wanrah ïa ka Resolution hapoh ïingdorbar, u Dr Lyngdoh, u la ong ba ka jingmut jong kane ka skhim ba la bei pisa da ka sorkar pdeng ka long ban pynïoh um sha ki ïing briew, hynrei ha kiba bun tylli ki shnong ba la lap ba wat lada ki kor um ki la poi ha ïing ruh, pynban ka um ka ju poi ne mih satia na kine ki kor um. Nangta u la ong ruh ba ki don bun ki jaka kiba ka jingtreikam kam long satia kaba i hun bad kam don ka jingtreikam kaba pynhun ïa u paidbah.
U la ong ruh ba ka JJM kadei ka skhim kaba bun bah ka pisa bad ka donkam ban thung da ka jingtohkit kaba khlaiñ, khnang ban lap ïa ka jingbym biang ka rukom treikam. U MLA Umsning, u la kdew ruh halor ka jingmih khubor ïa ka jingshahleh shiliang u MLA ka Mawlai ha kaba ïadei bad ka jingpyntreikam ïa kane ka skhim, ha kaba ym shym la khot satia ïa u ha ka por ba pynlong ïa ka jingïalang ha Mawlai ban ïakren ïa kane ka skhim. “Hato kane ka jingbym khot lang ïa u MLA ka Mawlai kadei ka jingthmu ban set na u ne ban un nym tip ba kam don ka jingtreikam kaba beit ha kaba ïadei bad ka skhim JJMï”, u la ong. U Dr. Lyngdoh, u la ong ba mynta ka jia ïa u MLA ka Mawlai, lashai kan jia sa ïano pat ym lah ban tip. “Ngim dei ban ailad ïa ki rukom leh kiba kum kine”, u la ong.
Ïa kane ka Resolution la kyrshan ruh da u bah Ronnie Lyngdoh, MLA ka Congress na Mylliem, uba la kdew ïa kiba bun ki jingbym biang ha ka jingpyntreikam ïa kane ka skhim, ha kaba u la lap dalade hi ha kiba bun tylli ki shnong ïa ka rukom trei ka bym biang satia.
