Dawa thung Magisterial Enquiry ki bahaïing ka samla pule Shillong Polytechnic

Shillong, Naitung, 23: Ki bahaïing hasem ryngkat ka jingsynran lang jong ki nongïalam sengbhalang na rilum Garo ha ka sngi Baar ki la aiti ïa ka dorkhas ha ka Deputy Commissioner jong ka East Khasi Hills District ka Kong RM Kurbah bad dawa ruh ban thung da ka Magisterial Enquiry halor ka jingïap jong ka samla pule Diploma ha ka Civil Engineering ka Diana Dimre Ch. Marak, 24 snem ka rta ha ka jaka pule ha Shillong Polytechnic, kaba don ha Mawlai, Shillong.
Ïa ka met ba la sdien phasi jong ka samla Diana Dimre Ch. Marak ha ka grill jingkhangiit ha ka Girl’s Hostel ha Shillong Polytechnic, Mawlai ha ka mala kaba nyngkong la lap da u Chowkidar u Bah Khrawkupar Suchiang ha ka por 2:00 baje mynstep ha ka 6 tarik, Jymmang, 2024.
Ïa ka met jong kane ka samla ka sah ha ka shnong Upper Babupara, Tura, West Garo Hills District la tep donburom ha ka 7 tarik, Jymmang, 2024 hadien ba la aiti noh sha ki bahaing hasem hadien ka jingleh post mortem.
U President ka FKJGP, Garo Hills u Pritam Arengh ha ka jingïakren bad ki lad pathai khubor u la ïathuh ba ka Deputy Commisioner ka la kular ban thung ïa ka Magisterial Enquity katkum ka jingkwah jong ki bahaing hasem halor ka jingartatien ba ka samla Diana kan pynïap hi ïalade da kaba sdien phasi hadien ba la ïoh pdiang hadien artaiew ïa ka kaiphod Postmortem bad ïohi ruh ïa ki dur ba la shon shwa ban pynhiar noh ïa ka na u tyllai phasi da ki Pulit ka Mawlai Police Station.
“Ki bahaing hasem haba ki ïanujor ïa ki dur ki dar ba la ïoh pdiang kim ikop satia ba ka samla Diana kan sdien phasi hi ïalade bad dei kane kaba pynartatien ïa ngi ba ki lah ban don mano mano ki kynhun runar kiba donkti hynrei watla katta ngim kynnoh ïano ïano. Ngi la kyntu ïa ka Deputy Commissioner ban thung da ka Magisterial Enquiry namarba ki bahaiing hasem kim hun ïa ka kaiphod Post Mortem,” u la ong.
U la ïathuh ruh ba ïa ka kaiphod Postmortem la aiti sha ki bahaing hadien artaiew ba la ujor da ka ejahar bad na ka liang jong ki bahaing ki kwah ruh ban khlong biang ïa ka met khnang ban lap ïa ki jingshisha.
Ha ka dorkhas, kane ka kynhun ki sengbhalang na rilum Garo kiba kynthup ïa ka ADE, FKJGP, FAF, GSU bad ka AYWO ki la pyntip ba katkum ka jingïathuh jong ki bahaing hasem, ka samla Diana ka la telephone sha u kpa ha ka por 3:00 baje noh sngi ha ka 5 tarik Jymmang, 2024 da kaba ïam bad khlem ïathuh eiei ïa kaba la jia hapoh ka jaka pule ha kaba u kpa u la shu pyrkhat ba lehse ka dei tang na ka daw ba ka la phiel ïa ka eksamin.
Tang shu tip ïa kane, ki para jong ka, kawei kaba pule ha Orissa bad kawei kaba pule ha Shillong ki la telephone ban wad ïa ka jingshisha. Ha ka para kaba pule ha Orissa ka samla Diana ka la phla ba katto katne ki paralok ba pule lang ki la wan rung sha kamra jong ka ban kren beiñ bad kren da ki ktien sniew bad kynnoh ruh ba ka la pynphriang khubor lamler tangba kam shym la ïathuh satia ka kyrteng jong kita ki paralok kiba wan rung hapoh kamra jong ka.
“Ha ka por 4:11 baje janmiet u kpa u la telephone biang ban kylli, hynrei ka (samla Diana) la shu jubab ba wat ka paralok kaba ka shaniah tam ruh kam shym la ïarap ïa ka,” ong ka dorkhas bad bynrap, “ha ka por 7:00 baje janmiet ka kmie ruh ka la telephone bad da ka jingpynbor jong ka kmie ka (samla Diana) la ïathuh ba ki paralok ba pule ki la pyndik ïa ka bad byrngem ruh ba ka dei ban mih noh na Hostel bad na Campus. Ka kmie ka la shu pyntngen da kaba ong ba kan leit pyntip sha u Principal hynrei ka la ïathuh ba ka la don sha Hostel bad ka por ruh ka la miet bad ym lah ban leit ïathuh sha u Principal bad ka kmie ka la pyntngen da kaba ong ba kan leit pyntip sha ka Warden hynrei ka la ïathuh ba ka Warden ruh ka pep trei. Ka kmie ka la bthah ba kan shu pynjaijai noh ïalade tad haduh ban da ïoh jingïarap.”
Ka dorkhas ka la bteng ruh da kaba ïathuh, ha ka 6 tarik Jymmang, 2024, hadien ka jingïap jong ka samla Diana, ka paralok kaba sah lang ha kajuh ka kamra ka la telephone ïa ka hymmen jong ka Diana hapdeng ka por kumba 10:00 baje haduh 12:00 baje shiteng sngi ban pyntip ba ha ka 5 tarik Jymmang, 2024, katkum ka jingkynmaw jong ka hymmen kynthei ki jingjia ki long kumne, san ngut ki para klas kiba sah lang bad ka samla Diana ki la leit rung ha ka kamra bad kren da ki ktien sniew ïa ka. Haba kylli balei, kane ka khynnah ba sahlang ka la ïathuh ïa ka hymmen jong ka samla Diana ba ha ka farewell program ba la pynlong na ka bynta ki samla pule 6th Semester jong ka Department of Civil Engineering jong ka Shillong Polytechnic Institute ha ka 4 tarik Jymmang, 2024, la bynshet ha ka samla Diana kum ka nonglum pisa ban pynkhreh ïa ka farewell program. Shuh shuh, ka la ïathuh ba ka samla Diana ka la shah pynbor ha ki para klas ban pan jingïarap pisa na ki Professor jong kiwei kiwei ruh ki Deparment, hynrei ka la kyntait mardor. Katkum ka jingïathuh jong kane ka khynnah kaba sahlang ha kajuh ka kamra hadien ba la kut ka farewell program ki para klas ki la leit noh sha ki kamra sah sha Hostel bad kren da ki ktien sniew ïa ka samla Diana. Kine ki san ngut ki la dawa ba ka dei ban pynphai noh ïa ka pisa kaba ki la synñiang na ka bynta ka farwell program. Ki la kynnoh ruh ba dei ma ka, kaba pynphriang khubor lamler bad katba ki dang mih na kamra ki la ong ïa ka samla Diana ba kin ym map shuh ïa ka. Hynrei haba ka hymmen ka la tohkit na kane ka khynnah ba sah lang ka la shu ong beit em bad kam shym la ïathuh eiei shaphang ka jingpynsaphriang khubor lamler.
Shuh shuh, ha ka 8 tarik, Jymmang, 2024, katkum ka jingkam jong u kpa ka samla Diana, u kpa jong ka para khynnah kaba sah lang bad ka samla Diana, u la leit jngoh bad kam ba ka khun kynthei jong u ka la pyntngen ïa ka samla Diana haduh ka por 2:00 baje mynstep ha ka 6 tarik Jymmang, 2024. Hynrei, katkum ka kaiphod Post Mortem, ka por ba la khladnoh ka long hapdeng 8:00 haduh 12:00 kynta ha ka por ba la leh ïa ka Post Mortem. Ka por bad ka tarik ba la leh ïa ka post mortem ka long ha ka 6 tarik, Jymmang, 2024 ha ka por 11:35 baje mynstep. Ka por ba la pyndep ïa ka jingleh post mortem ka dei ha kajuh ka sngi ha ka por 12:30 baje mynsngi. Hynrei lada kheiñ bha, ka por ba la khladnoh kan dei hapdeng 11:35 baje mynmiet ka 5 tarik Jymmang, 2024 bad 4:40 baje mynstep jong ka 6 tarik, Jymmang, 2024.
Ka dorkhas ka la buh jingkylli ruh ba ka samla Diana kaba jrong tang 5phut 3 inshi kumno kan lah ban kiew ïa ka shaduh ka jingkhangiit kaba jrong ban teh ïa ka jaiñ na u ryndang lajong. Katkum ki dur ba la sakhi, ka jaka ba la phasi ka dei kaba jrong bad buh jingkylli ruh kumno kan kiew shaduh ka grill jingkhangiit kaba jrong lait noh bad wat ki bahaing hasem ruh ki kyntait ba kan kiew hi dalade shalor ban phasi ïalade.
Nalor kata, ka dorkhas ka la ong, ba la ïohi ruh ha ka dur ba la shon ba ka don ka jingkieng ha jaka ba la phasi. Haba kylli, hato ka jingkieng ka la don lypa neem ha kane ka jaka, hynrei la pyntip sha ki bahaing hasem jong ka samla Diana da ki bor pynïaid jong ka Shillong Polytechnic Institute ba ka jingkieng ka dei kaba la pyndonkam da ki Pulit ban ïa ka met jong ka samla Diana na ka jaiñ phasi. “Lada ki Pulit kiba la shah hikan pyntbit ruh kin dang pyndonkam da ka jingkieng ban pynhiar ïa ka met, kumno ka samla kynthei kaba 24 snem ka rta kaba don ïa ka rynieng kaba 5phut 3 inshi kan lah ban kiew sha ka grill jingkhangiit nalor ba kam dei ka samla kaba ju ïalehkai sports bad kaba khlaiñ.
Ka dorkhas ka la ïathuh shuh shuh ba ki kur jong u kpa bad ka kmie kiba la pynlong jingïalang ha ka 14 tarik, Jymmang, 2024 ki la pynkut da kaba ong ba ka jingïap jong ka samla Diana ka don eiei sha lyndet. Kine ki ar kur ki la ujor ruh da ka ejahar sha ki Pulit halor ka jingkynnoh ba ka samla Diana ka la phasi hi ïalade lyngna ka Zero FIR ha Tura Sadar Police Station, West Garo Hills ha ka 16 tarik, Jymmang, 2024. Shuh shuh la phah ruh ïa ka shithi sha u Superintendent of Police jong ka East Khasi Hills da u Chairman jong ka Babupara Chambugong Mahari Association ha ka 16 tarik, Jymmang, 2024.
Shuh shuh ha ka dorkhas, la pynpaw haba pynshongnia ïa ki jingjia ha ka 4 tarik, 5 tarik, 6 tarik, 7 tarik bad 8 tarik Jymmang, 2024, ngi pynkut ba ki jingdawa jong ki Kur ki long kiba shongnia bad shonghok namarba ym pat pyni dak eiei ban leh ïa ka Hispathology ha kaba ïadei bad ka jingkhlong biang ïa ka met, ki bahaing ne wat ki kur kim shym la ïoh ktien eiei halor ka jingtohkit ba malu mala jong ki Pulit watla ki la ïai kyrpad. Watla san ngut ki samla pule ki la shah jer kyrteng ha ka ejahar kaba la ujor ha ka 16 tarik, Jymmang, 2024 hynrei kam shym la don ka jingtohkit kaba bniah na u Investigation Officer ba la bynshet ïa kane ka case. U ophisar Pulit uba pynhiar ïa ka met jong ka samla Diana shwa ban poi ki bahaing, wat haba ladep kyrpad ruh u dei ban shah tohkit. U briew uba kam ïalade kum u nonghikai jong ka Shillong Polytechnic Institute ruh dei ban wad bniah bad ban tohkit bniah. Ïa ka khynnah kaba sahlang bad ka samla Diana dei ban tohkit ban ban kylli kiei kita ki jingpynphriang khubor lamler kaba ki ïakren bad dei ban da tohkit bniah. Ïa u/ka Warden ruh dei ban da tohkit bniah balei u/ka pep trei ha kato ka sngi ba la jia ka jingjia ba sngewsih. Ïa u Director jong ka Shillong Polytechnic dei ban tohkit ba balei ym shym la don mano mano ruh na ka liang jong ki bor pynïaid ha ka por ba la aiti ïa ka met jong ka samla Diana sha ki bahaiing hasem. U Director ka Shillong Polytechnic um shym la phone ne leit pyntngen ïa ki bahaing hasem haduh kine ki sngi, kaba pyni ïa ka jingbym don akor bad lam sha ka jingsuba sniew. Ka shlem pule ba bna nam kum ka Shillong Polytechnic ka dei ban pyndait da ki CCTV Camera ban ïarap ïa ki samla ba kin lait na kino kino ki jingshah byrngem.