Dawa pynkynriah shwa ka CCIB ïa ka Join Inspection ker sainar shiah, katba ka kam ka dang don hapoh ka ïing bishar

Jowai, Jymmang 19: Ka Co-Ordination Committee on International Border (CCIB) mynta ka lah sngi U Blei kala leit ban ai da ka jingthoh sha ka ophis u Deputy Commissioner lyngba ka kong H.M.L. Kynta (MCS) Additional Deputy Commissioner (Revenue) West Jaiñtia Hills District, Jowai ban dawa pynkynriah shwa ïaka jingthmu pynlong ïa ka ‘Joint Inspection/Survey’ naka bynta ka jingker sainar siah ha khappud bad ka Ri Bangladesh.
Ka CCIB kala pyrshah jur ïa kane ka jingkhot ‘Joint Inspection’ ka ban long lashai ka sngi 20 tarik bad ka 21 tarik u Jymmang, 2025 ha ki bynta ka Amjalong, Kyrweng bad Jaliakhola kiba dei ki shnong ba dang hap hapoh ka West Jaiñtia Hills District jong ka Amlarem Sub-Division, namar ïa kane ka kam ka dang don hapoh ka jingkhmih jong ka ïing bishar ba don burom.
U Chairman Co-Ordination Committee on International Border (CCIB) bah Sukkynjai Myrchiang ha ryngkat ki Dkhot ka Khasi Students’ Union (KSU), FKJGP bad HNYF, hadien ka jingïakynduh bad ka kong Kynta mynta ka sngi, ula ong na ka liang ki trai jaka kila dep ban ujor ïa kane ka kam ker sainar siah sha ka ïing bishar naduh u snem 2021.
Shuh shuh ula ong naka liang ka CCIB ha ryngkat ki trai jaka jong kitei ki thaiñ “kim pyrshah satia ïa kane ka jingthmu ker sainar siah, hynrei ka jingdawa ba kongsan jong ki ka long ba ki trai shnong kim dei ban duh ïa ki jaka bad ki puta jong ki na ka jingker sainar siah”.
Halor kane ka CCIB ka kyntu jur ïa ki bor District ba kin pynkynriah shwa ban pynlong ïa kane ka Join Inspection, katba ka kam ïa pynbeit ka dang don hapoh ka ïing bishar, khnang ban lait na kino kino ki jingeh da kaba ailad shwa ïa ka Court ban shim ïa ka rai.