Jowai, Ïaïong, 16: Shi sngi hadien ka jingshah lynshop ki paidbah nongshong shnong na ka liang u MDC ka 11-Shilliang Myntang u ma Daeimi Liam mynta ka sngi 16 tarik ïa Ïaïong ula phah da ka jingthoh sha u Deputy Commissioner ka West Jaiñtia Hills District bad kumjuh sha u Block Development Officer (BDO) ka Laskeiñ C&RD.
Ha ka shithi u MDC ula dawa jur ban pynïoh jingïarap ïa ki longïing kiba shah ktah na ka jingwan lyngshop u Phria ha ka 14 tarik u Ïaïong, 2025 kata ha ka shnong Latymphu A, Lathumphu B, Musiaw, Umsalang, Thadbamon, Sookhlieh, Lummuriap, Bhain bad Thadsning kiba dang hap hapoh ka Constituency jong u ma Liam.
Kane ka jingwan lynshop phria ka la pynjot pynpra ïa kiba bun ki tnum ïing bad ki jingkhang jong ki longïing kiba la ngat ha kane ka lanot.
Halor kane jingshaktah u MDC ula dawa na ki bor sorkar ba kin pynïoh jingïarap pisa mar mar sha kitei ki longïing ba shah ktah, khnang ba kin ïoh ban maramot ïa ki bynta ba shah pynjulor bad ban shan thymmai ïa ki jingdonkam.
Ha kajuh ka por u kyntu jur ïa ki bor ba dei peit ba kin leit ban jurip dalade hi sha kitei ki jaka ha ryngkat ka jingai jingïarap.
