Shillong, ïaïong 01: Arphew san tylli ki longïng na ka shnong Lawbyrwa Ri-bhoi district, kila dawa ïa u Syiem ka Raid Mawbuh ban phiah shnong bad ban ai Rangbah Shnong thymmai ïa ki nongshong shnong ka Lawbyrwa namar ka jingkynnoh leh donbor u Rangbah Shnong thymmai bah Rijied Kharkrang.
Ha kaba iadei bad kane haba kren sha ki lad pathai khubor u Bah David Kurbah uwei na ki nongshong shnong ka Lawbyrwa, u la ong ba kane ka jingïakynad hapoh ka shnong la kynnoh ba ka la mih naduh ba shimti u Bah Rijied Kharkrang kum u Rangbah shnong thymmai.
U la pynshai ruh ba ka jingkam u Rangbah Shnong ba ki don tang 5 tylli ki longïing ka long kaba bakla namar ki don haduh 25 tylli ki longïing kiba kwah ban ïoh ïa la ka jong ka shnong ban lait na ka kynrum kynram.
U la kynnoh ruh ba une u Rangbah Shnong u la leh donbor da kaba rat wat ïa ki pipe JJM na kine ki longïing bad byrngem ruh ban pynduh ïa kane ka scheme nalor ban pynduh ruh ïa ka Certificate shnong.
“U Rangbah Shnong thymmai u Bah Rijied Kharkrang u shun bha iaki 25 tylli longiing naduh ba u jop iaka ilekshon Rangbah Shnong daka ba kynnoh ba ngim pdiang ia u ban long nongialam shnong bad ula kynnoh ruh ba ngi ki 25 ing ngi dei ki Sohlah pyut, u dieng pynkiang bad u maw jingthut” kila kynnoh.
