Dawa ki samla wadkam ka WKH ban pynbna noh kham kloi ïa ka jingpynrung kam Pulit

Shillong, ïaïong, 22: Katto katne ngut ki samla wadkam na Nongstoiñ, West Khasi Hills District ki la wan kiew sha nongbah Shillong ban dawa ïa ka tnat Kam Pohïing jong ka Sorkar Jylla ba ka dei ban pynbna noh kham kloi ïa ka jingpynrungkam Pulit.
Kane ka jingdawa jong kine ki samla ka long hadien ba u Symbud Myntri Rangbah ka jylla u Bah Prestone Tynsong uba peit ruh ïa ka tnat Kam Pohïing jong ka Sorkar Jylla dang shen u la ong ba ka jylla ka dang don hapdeng ka jingduna ha ka jingdon ki Pulit bad ka dang donkam kumba 3500-4000 hajar ngut ki Pulit ha ki kyrdan bapher bapher.
U Bah Prestone u la kren ïa kane ha ka jingïalang kaba la long dang shen bad ki heh Pulit ka jylla kaba la tip kum ka SP/CO Conference kaba la long ha Police Headquarter, Shillong.
“Kawei na ki jingeh kaba ka tnad pulit ka mad ka dei namar ka jingduna ha ka jingdon jong ki Pulit bad ka donkam haduh 3500 haduh 4000 ngut ki Pulit. Ka jingïalang ka la shim ïa ka rai ban pynsted ïa ka jingthepkam ha ka tnad Pulit ha ki kyrdan ki bapher bapher khnang ba kin lah ban ai ka jingshakri bad ban pynneh ïa ka shongsuk shongsaiñ” ong u Bah Prestone.
Ha ka jingïakren bad ki lad pathai khubor ha ka sngi Saitjaiñ, u Samla Shine Marweiñ bad u Samla M. Parïong ki la ong, “khnang ba ki samla khlemkam kin ïohlad ban pynrung kyrteng ban ïoh mareh, ïatynjuh ha ka jingïakob ha ka jingkoit jingkhiah bad ka jingproh jabieng ka Sorkar ka ladei ban pynbna noh mardor ïa ka jingkhot pynrungkam.”
Na ka liang jong kine ki samla ki la kyntu ruh ïa ka Sorkar ba kam dei shuh ban ap tad haduh ba ki samla kin da mih ban pynlong da ki jingïakhih ha surok na ka jingkyrduhkam kyrduh jam.