Nongstoiñ, Naiwieng 08: Ka jingdon jong ka surok ka surok na Rwiang shaduh Athiabari kaba jngai kumba san phew wei kilomitar, ka la long ka jingkyrkhu kaba khraw ïa ki paitbah nongshong shnong ka thaiñ Muliang bad jong ki bynta jong ka West kiba hap ha ka thaiñ Nongstoiñ. Hynrei, kumba ka long mynta katei ka surok ka dei kaba rit.
Kum ban pynkynmaw ba ïa katei ka surok na Rwiang haduh Ktiehthawïar kaba jngai kumba 22 kilomitar, la pynbha bad siang rong naduh u snem 2011-12 ha ka por ba ka sorkar Meghalaya Progressive Alliance ba u (L) Dr Donkupar Roy u dang long kum u Myntri Rangbah ka jylla, katba na Ktiehthawïar sha Langja kaba don tang kumba ar kilomitar ka dang dei ka surok khyndew bad na Langja shaduh Mawthawkrah pat, la bteng da ka surok PMGSY kaba dang shu dep siang rong ha kine ki khyndiat snem ba la dep haduh Tynghor.
Ka jingpynbha bad siang rong na Tynghor shaduh Athiabari pat dang shu pyndep ha u snem ba la dep kata ha u 2023. Kum ban pynkynmaw ba ka jingpyndep ban siang rong ïa katei ka surok naduh Rwiang sha duh Athiabari kaba jngai ka dei hadien ba ka sorkar pdeng ka la shimti ban pyntrei lyngba ka skhim PMGSY. Wat la ïa katei ka surok la dep ban sian grong hynrei ka dang long pat ka surok kaba rit bad kaba khim bha.
U Secretary jong ka shnong Langja u Bah Besralding Kharsyiemlieh ryngkat u Sordar barim u Bah Dreston Kharsyiemlieh haba ïakren bad u nongthoh khubor u la ong ba ki paitbah ka thaiñ Muliang baroh, ki da angnud eh ba ka sorkar kan thaw ki lad ki lynti kumno ban pynheh biang ïa katei ka surok.
U Bah Kharsyiemlieh u la ong ruh ba katba nang mih ki sngi ki kali kiba ïaid lyngba katei ka surok, ki la nang bun bad ki nongshong shnong naduh Athiabari shaneng haba ki leit donkam sha Nongstoiñ ki ïaid lyngba katei ka surok, namar ka kham jan ban ïa kaba leit lyngba ka Riangdo, ha kaba ka jingjngai na Rwiang sha Athiabari ka long tang sanphew wei kilomitar katba Rwiang shaduh Athiabari ka jingjngai ka long haduh hynriewphew ar kilomitar.
U la ong ruh ba baroh ki paitbah nongshong shnog ka thaiñ Muliang, ki dei kiba im ha ka rep ka riang bad ka ïew Hahim bad Boko ha Assam ki dei ki ïew ki hat, ba ki paitbah ka thaiñ ki sngew trai bha namar ki dei kiba jan bha bad ka khaïi ka pateng jong ki nongrep ha kitei ki ïew ka dei kaba kongsan bha.
Ha kajuh ka por u la ong ba na hadien ba ki paitbah ka thaiñ ki la pynsngew na ka por sha ka por shaphang ka jingdonkam ban pynheh ïa katei ka surok, na ka liang ki rangbah shnong ka thaiñ ba kynthup naduh Athiabari ki la dep ban leit ïakynduh ïa u bah Prestone Tynsong Symbud Myntri Rangbah ka jylla u ba bat ruh ïa ka tnad PWD ban pynsgew halor ka jingangnud jong ki paitbah.
Na ka liang jong u Symbud Myntri Rangbah u la kular ba un sa shimkhia bad u la ong ruh ba ka sorkar kan sa ïaleh katba lah ban thaw ki lad ki lynti na ka bynta ban pynurlong ïa ka jingangnud jong ki paitbah ka thaiñ.
