Dawa ki paidbah ïa ka MeECL ban wanrah da ka 132 KV Power Sub-station ha Nongpoh

Nongpoh, Nailar 02: Ki sengbhalang naka them Ri Bhoi bala lam khmat da ka seng Khasi Student Union, Nongpoh Circle bala snohkti lang ruh da ka FKJGP, HNYF RBYF, ki longkmie longkpa lem bad ki khynnah skul mynta ka sngi kila mih paidbah ryngkat ki placard ban pyrta shla halor ka jinglip bording khah khah ha ka thaiñ Nongpoh bad ka dong Ri Bhoi baroh kawei kaba la pynsyrtok bad pynbitar ïaki paidbah nongshong shnong ha kaba naka liang ki sengbhalang, ki paidbah lem bad ki samla pule kila ïaid ha surok naduh madan Pahamsyiem bad pynkut pat ha ophis u SDO ka MeECL ha Umlyngkdait.
Hadien ka jingïaid paidbah naka liang ka KSU kala pynlong ruh da ka jingïalang hakhmat ophis u SDO ka MeECL ha Nongpoh ha kaba naka liang ki nongkren ha katei ka sngi naduh ki nongïalam sengbhalang, ba kynthup ïa u Bah Ferdinald Kharkamni President ka KSU NKHD, James Hitler Mawphñiang Secretary, Luistar Lyngdoh President FKJGP NKHD, Marcus Marten President HNYF Northern Region, Mathew Makdoh Rangbah Shnong ka Pahamlapong bad Pahamsohtri, ki nonghikai bad kumjuh ruh ki longkmie longkpa kila pynpaw ba kum ki nongshong shnong ka them Ri Bhoi ki dap da ka jingdukha mynsiem ban mad jingeh naka jingduh khah khah ka bording eleltrik kaba la ktah shikatdei iaki samla pule, ki nongseng kam sengjam, katba ka bill light ka dang kiew arsut kaba kum ki paidbah ki shem jingeh ban siew.
Kum ki nongïalam seng kila leit ruh ban aiti da ka dorkhas ha u SDO ka MeECL Nongpoh Division bad kumjuh ruh ha u Additional Deputy Commissioner ka Ri Bhoi ba dei ban pynbiang mardor ïaka bording elektrik bad ban shimkhia ban ïakren bad ka sorkar ba dei ban pynbiang noh da u 132/33KV Substation ha Nongpoh ban pynthikna ba ka bording elektrik kan neh ha Nongpoh namar kum ki paidbah kila mad jingeh shisha ha kaba ïadei bad ka jingthud ka bording elektrik.
Hadien ka jingïalang paidbah naka liang u Samla Ferdinald Kharkamni President ka KSU North Khasi Hills District u la pynbna ruh ba kum ka seng kin ai por ïaka tnad MeECL ba kin trei shitom ban pynbha shuh shuh, namar ngi tip ba ka sorkar kan sa don jingmut ban wanrah ïaka Sub-Station ba 132 KV ha sor Nongpoh, pynthikna ban pynioh ïaka jaka ba thikna lym kumta kin shim ïaka sienjam ban khang tala syndon ïaka ophis treikam ka MeECL ha Nongpoh.
Shuh shuh, naka liang ka seng kan sa leit ruh ban ai da ka dorkhas sha u MLA ka Nongpoh bad kumjuh ruh ban leit ïakynduh syndon ïa u Myntri Rangbah ka jylla haki taiew ban wan naka bynta ban pynurlong noh ïaka jingdawa ban pynioh noh da u 132/33KV Sub Station ha Nongpoh, naka bynta ka jingbit jingbiang ka bording elektrik haka thaiñ Nongpoh kumba long ha kiwei ki district ka jylla.