Shillong, Jylliew 28: Ka FKJGP Riwar Mihngi bad ka HITO Pynursla Area naduh ka 4.3.2024 ki la leit buh ia ka shithi sha u Executive Director ka NHIDCL ban pynbiang ID ïa baroh ki nongtrei jong ka kompeni ha kane ka thaiñ. Hynrei, sngewsih ba haduh mynta kane kam poi shaei shaei ruh bad ka pyni shai ba na ka liang jong kane ka kompeni kam treh ban ïatreilang bad ki arseng.
Na ka liang kitei ki seng ki la ong ba ka jingthmu jong kane ka jingphah pynbiang ID ka dei halor ka nongrim ba kane ka jaka ka dei kaba hab ha ka Border Area Indo-Bangladesh namar na ka liang ki seng hi ki la pynpaw ia ka jingsngewkhia bha ïa ka jingrungtuh ki dkhar Bangladesh sha kane ka jylla kaba la long mynta manla ka por bad na ka liang ki arseng ki la ju ïoh kem ne bat ïa ki dkhar kiba rungtuh shane ha ka 10 snem 15 snem mynshwa bad dang mynha kane ka taïew kumba 2 ne 3 ngut ki dkhar Bangladesh kiba rungtuh shane kiba shang swari sha kane ka jylla bad donbok ba na ka liang ka seng FKJGP bad ka HITO la ïoh ban kem ne bat noh ïa ki.
Ha kaba iadei bad kane khnang ba kine ki nongtrei jong ka kompeni kin lait na ka jingshah talasi ne khynra ki dkhot Sengbhalang ha ki surok bad lynti syngkien bad kumjuh ruh ki briew kiba sngewkhia ïa ka jingrung tuh ki dkhar, la ai jingmut ïa ka NHIDCL ban pynbiang ID noh ïa kine ki dkhar.
Hynrei kumba ka long mynta kane ka kompeni kam kwah ban ïatreilang bad kane ka kam, kam poi shano shano namar ba ka kompeni kam treh ban pyndiang ïa ka jingai jingmut.
“Ha ngi hi u paidbah ka thaiñ shane ngim tip uno u dkhar Bangladesh bad uno u dkhar India, hynrei ngi tip beit ba u dkhar hi u dei u dkhar bad ka dur ka dar jong u ka long kumjuh la u dei na Bangladesh ne India ruh lymda ki don ïa ki ID ban pynshisha ïalade ba ki dei ki nongtrei jong ka kompeni. Nangne shakhmat ka jingkhynra kot khynra sla ïa ki dkhar hi kan long kumjuh bad ngin nang pynjur shuh shuh bad lada mih ka kynrum kynram ne ka jingpynkheiñ ïa ka aiñ (law and order issue) hadien habud halor kane, ai ka NHIDCL kan bah khlieh hi namar ba ngi ladep pyrshang ban ai jingïatreilang ban pynduna ïa ka jingkhynra kot khynra sla ïa ki dkhar ha lynti syngkien hynrei kane ka jingleh ka NHIDCL ka pyni shai ba ka kwah hi ba ngin talasi ne khynra beit ïa ki dkhar surok kumba leh ïa ki khar Bangladesh,” ong ka kyrwoh ba ka phah da u E. Khonglam president FKJGP Riwar Mihngi Circle.
